Është dënuar me 12 vite burgim Enedjos Guri, 15-vjeçari që 1 vit më parë vrau me thikë në fshatin Pirg të ...
BOTA
SHBA zgjeron listën e ndalimit të udhëtimit, Siria mes shtatë vendeve të reja
PiranjatPërditësimi i fundit 17 Dhjetor 2025, 21:13
Presidenti i Shteteve të Bashkuara, Donald Trump, ka zgjeruar listën e vendeve që do i nënshtrohen një ndalimi të plotë për hyrje në SHBA, duke përfshirë edhe Sirinë, si dhe disa shtete të tjera të Afrikës dhe Lindjes së Mesme. Në një deklaratë zyrtare, Shtëpia e Bardhë njoftoi se Trump ka nënshkruar një shpallje që “zgjeron dhe forcon kufizimet e hyrjes për shtetasit nga vende që paraqesin mangësi serioze dhe të vazhdueshme në proceset e shqyrtimit, verifikimit dhe shkëmbimit të informacionit”, me qëllim mbrojtjen e sigurisë kombëtare dhe publike të SHBA-së.
Sipas këtij vendimi, ndalimi i plotë i udhëtimit prek qytetarët e Burkina Fasos, Malit, Nigerit, Sudanit të Jugut, Sirisë, si dhe personat që mbajnë dokumente udhëtimi të lëshuara nga Autoriteti Palestinez. Po ashtu, Laosi dhe Sierra Leone, që më parë ishin subjekt i kufizimeve të pjesshme, tani do të përballen me ndalim të plotë hyrjeje në SHBA. Shtëpia e Bardhë bëri të ditur se ndalimi i zgjeruar do të hyjë në fuqi më 1 janar.
Ky vendim vjen pavarësisht deklaratave të mëparshme të Trump, i cili kishte premtuar mbështetje për stabilizimin e Sirisë pas bisedimeve të zhvilluara në nëntor me presidentin sirian Ahmed al-Sharaa. Ky i fundit, një ish-komandant i al-Kaedës dhe më herët i sanksionuar nga Uashingtoni, ka fituar vëmendje ndërkombëtare pas rrëzimit të Bashar al-Assadit dhe përpjekjeve për të paraqitur veten si një lider i moderuar.
Megjithatë, gjatë fundjavës, Trump reagoi ashpër pas njoftimit të ushtrisë amerikane se dy ushtarë amerikanë dhe një përkthyes civil u vranë në Siri nga një sulmues i dyshuar i ISIS-it, gjatë një sulmi ndaj një konvoji të përbashkët amerikan dhe sirian. Në një postim në platformën Truth Social, Trump paralajmëroi “hakmarrje shumë serioze”, duke e cilësuar incidentin si “të tmerrshëm”.
Siria u përmend drejtpërdrejt edhe në arsyetimin e Shtëpisë së Bardhë për ndalimin e udhëtimit. Sipas deklaratës, vendi po del nga një periudhë e gjatë trazirash dhe konfliktesh të brendshme dhe ende nuk disponon një autoritet qendror funksional për lëshimin e pasaportave dhe dokumenteve civile, si dhe masa të mjaftueshme për shqyrtimin dhe verifikimin e shtetasve.
