Shkarkimi i Kreshnik Hajdarit, KAS kthen çështjen për gjykim te Celibashi

Ilirjan Celibashi do duhet të vendosë për fatin e kreut të Bashkisë së Kuçovës, Kreshnik Hajdari.

Ky ishte vendimi që mori Komisioni i Ankesave dhe Sanksioneve në mënyrë unanime, duke detyruar Kryekomisionerin që të shqyrtojë çështjen në themel dhe duhet të shprehet për ligjshmërinë e qëndrimit të Kreshnik Hajdarit në zyrën e të parit të qytetit të Kuçovës.

Me këtë vendim të KAS, Celibashi është i detyruar të shqyrtojë dhe t’i japë fund kësaj çështje, e cila prej muajsh nuk po merret zgjidhje për shkak të ping pongut institucional.

KQZ dhe KAS janë vënë në lëvizje nga Lefter Maliqi, kandidat për Bashkinë Kuçovë në zgjedhjet e 14 Majit 2023, pasi Kreshnik Hajdari rezulton i dënuar me vendim të formës së prerë nga GJKKO me 6 muaj burg, i konvertuar në shërbim prove.

“1. Pranimin e pjesshëm të kërkesës ankimore, regjistruar me nr. 1 Regjitri, datë 01.06.2026, depozituar nga z. Lefter Maliqi (Partia e Lirisë).

2. Shfuqizimin e vendimit nr. 35, datë 21.05.2026, “Për shqyrtimin administrativ të rezultatit të verifikimit për subjektin vetëdeklarues, z. Kreshnik Riza Hajdari, Kryetar i Bashkisë Kuçovë, i propozuar nga subjekti zgjedhor “Partia Socialiste e Shqipërisë”, të Komisionerit Shtetëror të Zgjedhjeve.

3. Detyrimin e Komisionerit Shtetëror të Zgjedhjeve të shqyrtojë në themel çështjen administrative.

4. Rrëzimin e kërkesës për moslejimin e ankimit ndaj këtij ankimi”, thuhet në njoftimin e tyre”,- thuhet në njoftimin e KAS.