Shpërthim i fuqishëm në fabrikën e municioneve pranë Romës, zjarrfikësit nuk hyjnë dot

Një shpërthim i fuqishëm, i pasuar nga një zjarr, ka tronditur sot një fabrikë të madhe municionesh në Colleferro, rreth 50 kilometra në jug të Romës në Itali.

Ngjarja ka shkaktuar alarm në zonë, ndërsa ekipet e emergjencës janë angazhuar për menaxhimin e situatës.

Shpërthimi ka ndodhur në ish-fabrikën Simmel Difesa, e cila aktualisht është në pronësi të kompanisë KNDS Ammo Italy, e specializuar në prodhimin e municioneve të kalibrave të mesëm dhe të mëdhenj për përdorim tokësor dhe detar, si dhe të lëndëve djegëse të ngurta për raketat hapësinore.

Sipas raportimeve të para, shpërthimi dhe zjarri kanë përfshirë repartin ku kryhet presimi i barutit.

Në vendngjarje janë nisur disa ekipe zjarrfikëse, por ndërhyrja është komplikuar nga rreziku i vazhdueshëm në zonën e prekur. Për këtë arsye, ekipet nuk kanë mundur ende të hyjnë në repartin ku ka ndodhur shpërthimi.

Deri tani nuk ka informacion zyrtar për viktima apo persona të lënduar. Autoritetet italiane pritet të sqarojnë në vijim shkaqet e incidentit dhe përmasat e dëmeve.