Shpërthimi në një restorant në Moskë/ Gjenerali rus dyshohet se ishte shënjestra, bomba artizanale u soll si dhuratë nga një grua

Gjenerali rus Aleksandër Çajko dyshohet se ishte objektivi i sulmit me bombë në një restorant në Moskë, ku humbën jetën pesë persona dhe u plagosën 19 të tjerë. Sipas mediave të huaja, Çajko po festonte 55-vjetorin e lindjes në restorantin Balzi Rossi, i cili ndodhet vetëm disa qindra metra larg Kremlinit.

Bomba artizanale, e cila thuhet se ishte e mbushur me sfera metalike për të rritur fuqinë shkatërruese, dyshohet se u soll në restorant nga një grua si një dhuratë e rreme. Pajisja shpërtheu pasi u identifikua brenda ambienteve të lokalit, ndërsa gruaja humbi jetën në vend.

Në festën, e cila sipas mediave kishte një kosto prej mijëra eurosh, merrnin pjesë politikanë rusë, oficerë të lartë ushtarakë dhe përfaqësues të shërbimeve sekrete. Mes pesë viktimave është edhe dhëndri i gjeneralit, 27-vjeçari Danil Perendri, ish-lojtar profesionist i hokejit mbi akull. Ndërkohë, vajza 25-vjeçare e gjeneralit, Maria Perendri, është mes 19 të plagosurve dhe raportohet se ka pësuar lëndime të rënda në kokë.