Shtireshin si inspektorë dhe zhvatën mbi 1.6 milionë euro, anëtarët e bandës pozonin me tufa të mëdha parash dhe shufra ari  

Anëtarët e organizatës kriminale, të cilët mashtronin qytetarët duke u paraqitur si punonjës ose kontabilistë të HEDNO-s, po kalonin një "kohë të vështirë", megjithëse arritën të përfitonin mbi 1.6 milionë euro.

Në imazhet e gjetura në telefonat e tyre celularë, të pandehurit shfaqen duke pozuar me shufra ari, tufa kartëmonedhash dhe ora të shtrenjta.

Operacioni i tyre u çmontua nga oficerët e Policisë Greke, pas një aksioni të zhvilluar të mërkurën e kaluar (1/7) në Zefyri. Në operacion morën pjesë efektivë të Nëndrejtorisë për Hetimin e Krimeve Ekonomike, me mbështetjen e një ekipi të OPKE-së nga Drejtoria për Hetimin dhe Ndjekjen Penale të Krimeve në Atikë.

Shtatë arrestime

Në kuadër të këtij operacioni u arrestuan shtatë anëtarë të organizatës kriminale, mes tyre edhe dy drejtuesit kryesorë, si dhe operatorët telefonikë. Ndaj tyre janë ngritur akuza për pjesëmarrje në organizatë kriminale dhe mashtrim të kryer në mënyrë profesionale, në bashkëpunim dhe në mënyrë të përsëritur. Autoritetet shfrytëzuan informacionin e mbledhur dhe, pas analizimit të të dhënave të siguruara, dokumentuan ekzistencën e një organizate kriminale me role të përcaktuara qartë dhe veprimtari të vazhdueshme, të paktën që nga marsi i vitit 2026. Sipas hetimeve, qëllimi i vetëm i grupit ishte mashtrimi sistematik i qytetarëve dhe përfitimi i paligjshëm financiar.

Konkretisht, për të arritur qëllimin e tyre, ata bënin telefonata të përditshme me viktima të mundshme, të dhënat e të cilave i merrnin nga drejtoritë telefonike, paraqiteshin në mënyrë të rreme si punonjës ose kontabilistë të HEDNO-s, përdornin pretekste të ndryshme, si deklarata tatimore, sigurim parash dhe sendesh me vlerë ose një rrjedhje të supozuar energjie elektrike, dhe i bindnin viktimat të mblidhnin para dhe sende me vlerë dhe t'i vendosnin ato në vende të paracaktuara brenda ose jashtë shtëpive të tyre.  Pastaj shkonin në shtëpi, nga ku merrnin ose nxirrnin paratë dhe sendet me vlerë, duke u shtirur sikur duheshin numëruar ose vlerësuar. 

Sa i përket roleve të tyre, anëtarët kryesorë ishin përgjegjës për koordinimin dhe mbikëqyrjen e organizatës kriminale, ndërsa operatorët telefonikë ishin përgjegjës për gjetjen e viktimave të mundshme, mbledhjen dhe aktivizimin e lidhjeve dhe pajisjeve telefonike, si dhe për kryerjen e telefonatave mashtruese. Në fakt, organizata kriminale vepronte në formën e një "biznesi familjar" pasi të gjithë anëtarët kishin lidhje familjare midis tyre, ndërsa vinin edhe nga i njëjti grup shoqëror.

Vihet re se, për të shmangur zbulimin, anëtarët e organizatës kriminale bënin ndryshime të shpeshta në instalimin e "qendrës së thirrjeve" dhe lidhjet telefonike që përdornin, ndërsa kishin instaluar qarqe mbikëqyrjeje dhe qepena sigurie në zonat e saj të operimit. Vlerësohet se përfitimi i paligjshëm financiar i organizatës ga aktivitetet e paligjshme të anëtarëve të saj tejkalon shumën prej 1,600,000 eurosh. Të arrestuarit u dërguan në prokurorinë kompetente, ndërsa hetimi për të përcaktuar fushëveprimin e plotë të aktiviteteve të tyre vazhdon. /PiranjatNews/

Galeria fotografike (

)