Sindikatat e Volkswagen paralajmërojnë: Kompania mund të shkurtojë deri në 140.000 vende pune

Sindikatat e Volkswagen kanë paralajmëruar se kompania mund të shkurtojë deri në 140,000 vende pune, përfshirë shkurtimet e dakorduara tashmë, ndërsa marrëdhëniet midis menaxhmentit dhe përfaqësuesve të punëtorëve janë të tendosura.

Kryetarja e këshillit të punëtorëve të Volkswagen, Daniela Cavallo, tha se besimi tek menaxhmenti dhe CEO Oliver Blume është thyer, ndërsa Christiana Benner nga sindikata IG Metal paralajmëroi se planet e tij për të ulur kostot dhe për të rritur fitimet janë jorealiste , raporton Bloomberg.

Blume u tha punonjësve se afërsisht gjysma e shkurtimeve shtesë të vendeve të punës të kompanisë do të duhej të zbatoheshin në Gjermani, duke përshkallëzuar më tej një mosmarrëveshje me sindikatat mbi ristrukturimin e prodhuesit më të madh të automjeteve në Evropë.

Gjatë një takimi me punonjësit në fabrikën kryesore të Volkswagen në Wolfsburg, ai tha se masa të tilla janë të nevojshme sepse kostot fikse të kompanisë janë 30 për qind më të larta se ato të konkurrentëve.

Përveç kësaj, ai vuri në dukje se 50,000 shkurtimet shtesë nga puna të përmendura shpesh në nivel global nuk janë domosdoshmërisht shifra përfundimtare.
Volkswagen tashmë po shkurton vende pune në Gjermani, pasi industria e automobilave të vendit përballet me kërkesë më të dobët, kosto të larta të energjisë dhe konkurrencë në rritje nga prodhuesit kinezë.

Kompania vlerëson se duhet të ulë kostot me të paktën 10 miliardë euro, me një ulje shtesë të kapacitetit të prodhimit evropian me rreth 500,000 automjete në vit.