16-vjeçari Arjon Xhezairi ka ndërruar jetë në Spitalin e Traumës në Tiranë, pasi nuk arriti t’u mbijetonte plagë...
BOTA
Sistemi EES sjell vonesa, nëntë vende të BE-së kërkojnë shtyrjen e kontrolleve të reja
PiranjatPërditësimi i fundit 15 September 2026, 14:41
Nëntë vende të Bashkimit Evropian, mes tyre Franca, Greqia, Italia dhe Portugalia, kanë kërkuar më shumë kohë për zbatimin e plotë të sistemit të ri të kontrolleve kufitare për qytetarët që nuk janë shtetas të BE-së, raportoi “The Guardian”.
Sistemi i quajtur EES (Entry/Exit System), ose Sistemi i Hyrje-Daljeve, regjistron në mënyrë elektronike udhëtarët që hyjnë dhe dalin nga zona Shengen.
Ndryshe nga sistemi tradicional i vulosjes së pasaportave, EES regjistron të dhënat biometrike të udhëtarëve, përfshirë gjurmët e gishtërinjve dhe imazhin e fytyrës.
Sistemi ishte planifikuar të zbatohej plotësisht më 6 shtator 2026, por disa vende kanë kërkuar shtyrje për shkak të problemeve teknike dhe kapacitetit të kufizuar në aeroporte, si dhe shqetësimeve se zbatimi i plotë mund të shkaktojë radhë të gjata dhe vonesa.
Përveç Francës, Greqisë, Portugalisë dhe Italisë, më shumë kohë kanë kërkuar edhe Gjermania, Malta, Holanda, Zvicra dhe Belgjika.
Ndërkohë, Spanja po e zbaton sistemin plotësisht.
Problemi kryesor lidhet me numrin e madh të udhëtarëve dhe kapacitetin e kufizuar të disa aeroporteve për të kryer regjistrimin biometrik.
Udhëtarëve u duhet të regjistrohen në sistem dhe t’u merren gjurmët e gishtërinjve dhe fotografia e fytyrës, një proces që mund të zgjasë më shumë se kontrollet tradicionale të pasaportave.
Sipas burimeve të BE-së, vetëm 12 nga rreth 1,500 pika kufitare kanë ende probleme me zbatimin e sistemit.
Në disa aeroporte të mëdha evropiane, përfshirë Frankfurtin dhe Schipholin, kontrollet biometrike tashmë po kryhen. Megjithatë, disa aeroporte më të vogla nuk janë ende plotësisht të përgatitura për zbatimin e sistemit.
Sipas burimeve të BE-së, EES është konsideruar deri tani një sukses.
Janë kryer rreth 200 milionë regjistrime, ndërsa rreth 70 mijë persona janë ndaluar të hyjnë në zonën Shengen.
Mes tyre ka pasur persona që nuk kishin vizë, edhe pse u kërkohej, persona që kishin qëndruar përtej afatit të lejuar, shtetas britanikë që kishin tejkaluar kufirin prej 90 ditësh të qëndrimit dhe persona që përdornin pasaporta ose dokumente identiteti të falsifikuara.
Regjistrimi i gjurmëve të gishtërinjve dhe fotografive të fytyrës ka ndihmuar gjithashtu autoritetet të identifikojnë persona që përdornin dokumente të ndryshme udhëtimi për të fshehur identitetin e tyre.
Bashkimi Evropian po përgatit gjithashtu aplikacionin “Travel to Europe”, përmes të cilit udhëtarët do të mund të regjistrojnë paraprakisht fotografinë e fytyrës dhe të dhënat e pasaportës para udhëtimit.
Sipas burimeve të cituara nga “The Guardian”, aplikacioni pritet të funksionojë së shpejti në shtatë vende.
Aktualisht, raportohet se ai është funksional vetëm në Suedi dhe Portugali.
