Kuvendi zhvillon sot seancën plenare, ndërsa paralelisht jashtë ambienteve të Parlamentit është paralajmëruar edhe një...
BOTA
Takim sekret për Iranin/ Krerët ushtarakë të SHBA, Izraelit dhe 7 vendeve arabe u mblodhën në Gjermani
PiranjatPërditësimi i fundit 16 Shtator 2026, 21:14
Komandantët e lartë ushtarakë të SHBA-ve, Izraelit dhe disa vendeve arabe janë takuar javën e kaluar në Gjermani për të diskutuar luftën me Iranin dhe tensionet më të gjera në Lindjen e Mesme. Takimi, i cili nuk ishte njoftuar zyrtarisht nga vendet pjesëmarrëse, u organizua nga komandanti i Komandës Qendrore të SHBA-ve (CENTCOM), admirali Brad Cooper.
Sipas dy zyrtarëve izraelitë të cituar nga Axios, në takim morën pjesë, përveç admiralit Cooper, edhe shefat e shtabeve të ushtrive të Izraelit, Arabisë Saudite, Emirateve të Bashkuara Arabe, Bahreinit, Kuvajtit, Katarit, Jordanisë dhe Egjiptit.
Takimi përbën një zhvillim të rëndësishëm, pasi është hera e parë që një grup i tillë komandantësh ushtarakë mblidhet që prej fillimit të luftës mes SHBA-ve, Izraelit dhe Iranit më shumë se gjashtë muaj më parë.
Cooper: SHBA nuk do të tërheqë trupat nga rajoni
Gjatë takimit, admirali Brad Cooper u ka dhënë homologëve të tij garanci se Ushtria amerikane nuk planifikon të tërheqë forcat nga Lindja e Mesme, pavarësisht sulmeve iraniane ndaj bazave amerikane në rajon.
Cooper gjithashtu informoi pjesëmarrësit mbi planin amerikan për zgjerimin e trafikut të anijeve në Ngushticën e Hormuzit, një prej pikave më strategjike të transportit të energjisë në botë.
Nga ana e tij, shefi i Shtabit të Përgjithshëm të Forcave të Mbrojtjes së Izraelit, gjenerali Eyal Zamir, u ka informuar pjesëmarrësit për operacionet e ushtrisë izraelite në fronte të ndryshme.
CENTCOM konfirmoi zhvillimin e takimit, por nuk dha detaje mbi diskutimet. Në një deklaratë, komanda amerikane tha se kishte pritur “drejtues të lartë ushtarakë nga tetë vende” në një konferencë të planifikuar në Gjermani, ku u diskutuan mundësitë për forcimin e bashkëpunimit të sigurisë në Lindjen e Mesme.
Bashkëpunimi Izrael-Arabia Saudite po thellohet
Takimi vjen në një kohë kur bashkëpunimi ushtarak dhe i sigurisë mes Izraelit dhe vendeve të rajonit është intensifikuar ndjeshëm.
Ky proces mori një shtysë të rëndësishme pas nënshkrimit të Marrëveshjeve të Abrahamit mes Izraelit, Emirateve të Bashkuara Arabe dhe Bahreinit në shtator 2020.
Pak kohë më pas, Izraeli u transferua nga zona e përgjegjësisë së Komandës Evropiane të SHBA-ve (EUCOM) në atë të CENTCOM, duke krijuar mundësi më të mëdha për bashkëpunim ushtarak me vendet arabe nën ombrellën e komandës amerikane.
Gjatë luftës, Izraeli ka bashkëpunuar me SHBA-të dhe Emiratet e Bashkuara Arabe në operacione mbrojtëse dhe operative. Sipas zyrtarëve izraelitë, Izraeli ka vendosur sistemin e mbrojtjes raketore Iron Dome në Emirate dhe ka ofruar asistencë në kohë reale për inteligjencën, survejimin dhe zbulimin (ISR).
Po ashtu, gjatë luftës është shtuar shkëmbimi i informacionit të inteligjencës mes Izraelit dhe vendeve të tjera arabe të rajonit.
Takimi u zhvillua ndërsa Houthit kanë intensifikuar sulmet ndaj Arabisë Saudite, duke avancuar në terren dhe, sipas burimeve të cituara nga Axios, duke marrë kontroll efektiv mbi Ngushticën Bab al-Mandab në Detin e Kuq.
Një burim me dijeni mbi zhvillimet tha se Izraeli dhe Arabia Saudite, me asistencën e CENTCOM, po diskutojnë mundësinë që Izraeli të mbështesë operacionet ushtarake saudite kundër Houthive.
Mbështetja e mundshme do të përfshinte edhe ofrimin e të dhënave të inteligjencës, survejimit dhe zbulimit (ISR), në një model të ngjashëm me asistencën që Izraeli i ka dhënë Emirateve të Bashkuara Arabe.
Takimi në Gjermani tregon për një koordinim gjithnjë e më të ngushtë mes SHBA-së, Izraelit dhe vendeve arabe në çështjet e sigurisë rajonale, në një periudhë tensionesh të larta me Iranin dhe aktorët e tij aleatë në Lindjen e Mesme.
