Gazetarët e Piranjat News kanë zbuluar se si funksionon tregu i paligjshëm i pasaportave bullgare që u ofrohen qytetarëve shqiptar&eum...
BOTA
Të shtëna dhe kaos në Parlament, pas tentativës për arrestimin e senatorit të kërkuar nga Haga
PiranjatPërditësimi i fundit 13 May 2026, 20:03
Të shtëna armësh dhe skena paniku janë regjistruar mbrëmjen e së mërkurës brenda Senatit të Filipineve, ndërsa autoritetet po përballeshin me senatorin Ronald “Bato” Dela Rosa, i kërkuar nga Gjykata Penale Ndërkombëtare (ICC) për krime kundër njerëzimit lidhur me luftën e përgjakshme kundër drogës gjatë presidencës së Rodrigo Dutertes.
Sipas raportimeve, më shumë se një duzinë të shtënash u dëgjuan brenda godinës së Senatit në Manila, duke shkaktuar kaos mes senatorëve, gazetarëve dhe stafit të sigurisë, të cilët u panë duke vrapuar për t’u strehuar. Deri tani nuk raportohen viktima apo të plagosur.
Ngjarja ndodhi ndërsa Dela Rosa ishte ngujuar prej dy ditësh brenda Senatit, ku mbahej nën “mbrojtje parlamentare” nga aleatët e tij politikë, për të shmangur arrestimin dhe transferimin drejt Hagës. ICC ka konfirmuar se ndaj tij ekziston një urdhër-arresti për krime kundër njerëzimit, lidhur me dhjetëra vrasje gjatë operacioneve anti-drogë në Filipine mes viteve 2016-2018.
Pamje të publikuara nga mediat filipinase tregojnë momentin kur të shtënat shpërthejnë brenda korridoreve të Senatit, ndërsa ushtarë, policë dhe forca speciale kishin rrethuar kompleksin. Në video dëgjohen britma dhe njerëz që urdhërohen të largohen me vrap.
Presidenti i Filipineve, Ferdinand Marcos Jr., reagoi pas incidentit duke deklaruar se asnjë forcë qeveritare nuk kishte hyrë në Senat për të arrestuar senatorin dhe se ende nuk dihet kush hapi zjarrin.
“Qeveria nuk është përgjegjëse për këtë. Nuk kishte ushtarë, policë apo agjentë të shtetit që hynë në Senat”, deklaroi Marcos, duke urdhëruar nisjen e një hetimi të plotë.
Ronald “Bato” Dela Rosa konsiderohet një nga figurat më të afërta të ish-presidentit Rodrigo Duterte dhe ishte shefi i policisë gjatë luftës famëkeqe kundër drogës, ku sipas të dhënave zyrtare u vranë mbi 6 mijë persona, ndërsa organizatat për të drejtat e njeriut pretendojnë se numri real i viktimave është shumë më i lartë.
Vetë Duterte ndodhet aktualisht në paraburgim në Hagë dhe pritet të dalë në gjyq nga ICC, duke u bërë ish-kreu i parë aziatik i shtetit që përballet me një proces të tillë ndërkombëtar.
