16-vjeçari Arjon Xhezairi ka ndërruar jetë në Spitalin e Traumës në Tiranë, pasi nuk arriti t’u mbijetonte plagë...
BOTA
Tensione në Britani/ Të veshur me të zeza dhe të maskuar, protestuesit në Dover bllokojnë rrugën e Portit: Ndaloni anijet
PiranjatPërditësimi i fundit 5 September 2026, 22:36
Dhjetëra persona të veshur me të zeza dhe me maska bllokuan të shtunën në mëngjes rrugët pranë portit të Doverit në Kent, duke shkaktuar trafiku dhe vonesa për udhëtarët. Sipas The Guardian, Policia e Kentit tha se ishte e pranishme në zonë dhe po merrej me protestën, ndërsa Porti i Doverit e përshkroi situatën si një incident të rendit publik.
Gjatë protestës nuk pati arrestime. Bllokada preku rrugët hyrëse dhe dalëse të portit, përfshirë autostradën. Bllokimi i rrugës në të dyja drejtimet shkaktoi vonesa deri në 30 minuta, ndërsa radha e automjeteve arriti në rreth 6.5 kilometra.
Pamjet e publikuara në rrjetet sociale treguan një grup të madh personash të maskuar duke marshuar në rrugë. Siç shihet edhe në video, protestuesit bllokuan rrugët dhe brohoritën slogane kundër emigracionit, ndërsa disa prej tyre bërtisnin “ndaloni anijet”.
Përgjegjësinë për protestën duket se e ka marrë grupi anti-imigracion Patriot Platform. Aktivisti i ekstremit të djathtë Tommy Robinson, emri i vërtetë Stephen Yaxley-Lennon, publikoi dhe shpërndau disa video nga protesta, duke u bërë thirrje mbështetësve të shkonin në Dover.
Numri i saktë i protestuesve nuk është bërë ende i ditur, por dëshmitarë në vendngjarje folën për qindra persona, ndërsa Policia e Kentit nuk ka dhënë një shifër zyrtare. Protesta ndikoi edhe në aktivitetet lokale. Aktiviteti i vrapimit 'Parkrun', i organizuar në Dover Waterfront, u anulua për shkak të situatës, ndërsa disa punonjës të portit u përballën me vështirësi për të dalë nga zona.
Deputeti laburist për Dover dhe Deal, Mike Tapp, e dënoi protestën dhe e cilësoi si një përpjekje për të shkaktuar trazira në qytet. Edhe qeveria britanike dënoi ndërprerjen e udhëtimit, duke theksuar se e drejta për protestë paqësore është themelore, por se nuk mund të justifikohet ndërprerja e transportit dhe shqetësimi i komunitetit.
