“Nuk jeni vetëm”, kanë qenë këto thirrjet e protestuesve ndërsa kanë mbërritur te Blloku i Sigurisë, në...
BOTA
TikTok përçan Brukselin, zyrtarët kërkojnë rishikimin e strategjisë së BE-së
PiranjatPërditësimi i fundit 2 Shtator 2026, 19:38
Komisioni Evropian po përballet me kundërshtime brenda selisë së tij në Berlaymont lidhur me vendimin për të mos hapur një llogari zyrtare në TikTok. Disa zyrtarë argumentojnë se Bashkimi Evropian rrezikon të humbasë terren në komunikimin me publikun, veçanërisht me të rinjtë, në një platformë që përdoret nga rreth 200 milionë evropianë.
Sipas Politico, çështja nëse ekzekutivi i BE-së duhet të krijojë një prani në platformën TikTok, në pronësi kineze, është diskutuar edhe në takime të nivelit të lartë. Të paktën një komisioner ka kërkuar rishikimin e qëndrimit aktual, bëri të ditur një zyrtar në kushte anonimiteti për shkak të natyrës së brendshme të diskutimeve.
Komisioni e ndaloi TikTok-un në pajisjet e stafit në vitin 2023, duke përmendur shqetësime për sigurinë kibernetike. Sipas një zëdhënësi të institucionit, ndalimi përfshin edhe pajisjet personale të regjistruara në shërbimin e menaxhimit të pajisjeve celulare të Komisionit.
“Ne ndjekim zhvillimet e platformës, veçanërisht sa i përket mbrojtjes së të dhënave dhe shqetësimeve për sigurinë kibernetike”, deklaroi Komisioni.
Megjithatë, aktualisht ka pak shenja se institucioni po përgatitet të ndryshojë politikën e tij. Sipas një zyrtari tjetër të njohur me diskutimet, Dana Spinant, drejtoreshë e përgjithshme e Komisionit për Komunikimin, kundërshton krijimin e një llogarie zyrtare. Spinant nuk iu përgjigj kërkesës së Politico për koment.
Një zyrtar i tretë tha se në kabinetet e disa komisionerëve ka pakënaqësi për faktin që Brukseli mungon në një platformë ku të rinjtë evropianë marrin gjithnjë e më shumë lajme dhe formojnë pikëpamjet e tyre.
Një tjetër zyrtar argumentoi se Rusia nuk ka të njëjtat rezerva për përdorimin e platformave të mediave sociale për të ndikuar opinionin publik evropian. Sipas tij, Komisioni nuk mund t’ua lërë këtë hapësirë aktorëve të tjerë.
Debati zhvillohet në një kohë kur presidentja e Komisionit Evropian, Ursula von der Leyen, dhe ekipi i saj po përpiqen të arrijnë një audiencë më të gjerë evropiane përmes rrjeteve sociale.
Von der Leyen pritet të ftojë në fjalimin e saj për Gjendjen e Bashkimit edhe influencues, përfshirë persona që publikojnë përmbajtje në TikTok. Një nga zyrtarët e cituar nga POLITICO e cilësoi si kontradiktore që Komisioni t’i nxisë influencuesit të përcjellin mesazhet e tij në këtë platformë, ndërsa vetë institucioni refuzon të krijojë një prani zyrtare atje.
Në vend të TikTok-ut, Komisioni po i kushton gjithnjë e më shumë vëmendje YouTube, platformës amerikane ku llogaria e tij numëron më shumë se 500 mijë abonentë, sipas dy zyrtarëve të cituar nga Politico.
Banka qendrore holandeze, DNB, ka zhvendosur 86 ton rezerva ari nga Shtetet e Bashkuara dhe Kanadaja drejt Londrës, duke e lidhur vendimin me rritjen e &ld...
