Kreu i Partisë Demokratike Sali Berisha gjatë një deklarate për shtyp tha se Shqipëria ka nevojë për vendosjen e një m...
BOTA
Tornado godet Francën, dhjetëra të plagosur dhe mbi 300 banesa të dëmtuara
PiranjatPërditësimi i fundit 25 Gusht 2026, 15:10
Një tornado ka goditur mbrëmjen e së hënës fshatin Pomas, në rajonin Aude të Francës jugperëndimore, duke lënë dhjetëra persona të plagosur dhe duke dëmtuar më shumë se 300 banesa.
Sipas autoriteteve franceze, dy persona ndodhen në gjendje kritike, ndërsa 37 të tjerë kanë marrë plagë. Deri tani nuk raportohet për persona të zhdukur, shkruan Sky News.
Tornadoja përshkoi zonën në orët e vona të së hënës, ndërsa rajoni Aude dhe pjesa më e madhe e jugperëndimit të Francës ndodheshin nën alarm portokalli për stuhi.
Ministri i Brendshëm francez, Laurent Nunez, e cilësoi fenomenin si një tornado me “intensitet të rrallë”, duke theksuar se ajo shkaktoi dëme të mëdha në fshat.
Përveç dëmeve në banesa, stuhia ka prekur edhe furnizimin me energji elektrike. Operatori i rrjetit energjetik ENEDIS bëri të ditur se rreth 21 mijë familje në jug të Francës mbetën pa energji elektrike deri në mëngjes.
Fenomeni ekstrem goditi Francën pas një vere të karakterizuar nga temperatura rekord dhe zjarre të mëdha pyjore. Në jugperëndim, një nga zjarret më të mëdha të muajit të kaluar përfshiu rreth 42 mijë hektarë, duke u renditur ndër zjarret më të mëdha në vend që prej Luftës së Dytë Botërore.
Vendi regjistron rreth 50 tornado në vit, kryesisht gjatë pranverës dhe verës, veçanërisht në veriperëndim dhe përgjatë zonave bregdetare të Mesdheut.
