Numri i aksidenteve rrugore në Shqipëri ka vijuar të rritet gjatë vitit 2026, duke arritur në 1,090 aksidente në periudh&eu...
BOTA
Tragjedi në Sahara, 49 persona vdesin nga etja pasi kamioni u bllokua në shkretëtirë
PiranjatPërditësimi i fundit 5 June 2026, 19:28
Të paktën 49 persona humbën jetën nga dehidratimi në shkretëtirën e Saharasë, pasi kamioni me të cilin udhëtonin pësoi defekt dhe mbeti i bllokuar për disa ditë në veri të Nigerit, njoftuan autoritetet lokale.
Viktimat, të gjithë shtetas të Nigerit, po ktheheshin nga një festë fetare në Mali kur automjeti u ndal në një zonë të izoluar, më shumë se 80 kilometra në perëndim të Assamakës, pranë kufirit me Malin dhe Algjerinë.
Sipas administratës rajonale të Agadezit, vetëm dy burra arritën të mbijetojnë. Ata ecën mbi 50 kilometra në kërkim të ujit dhe më pas mbërritën në Assamaka, ku lajmëruan autoritetet për situatën.
Një ekip që shkoi në vendngjarje konstatoi se kamioni kishte udhëtuar nga zona e Talhandakut në Mali, rreth 300 kilometra larg kufirit. Autoritetet nuk kanë sqaruar ende shkakun e defektit apo sa kohë pasagjerët mbetën të bllokuar në shkretëtirë.
“Dhjetëra trupa të pajetë u gjetën poshtë dhe përreth kamionit të bllokuar”, thuhet në deklaratën e autoriteteve lokale, të cilat përshkruan kushtet ekstreme të zonës, ku temperaturat e larta dhe mungesa e ujit e bëjnë mbijetesën jashtëzakonisht të vështirë.
49 viktimat u varrosën në vendngjarje, në varre të përbashkëta. Autoritetet e cilësuan procesin si veçanërisht të ndjeshëm dhe emocionalisht të rëndë për të mbijetuarit dhe ekipet e angazhuara në operacion.
