Guardia Civil po heton origjinën e një ngarkese të madhe kokaine, e zbuluar gjatë kësaj fundjave në dy magazina në zonën...
BOTA
Tragjedia familjare me tre të vdekur/ Autopsia te prindërit bën zbulimin tronditës
PiranjatPërditësimi i fundit 4 September 2026, 22:04
Arma mund të jetë përdorur nga të dy. Ky është një nga skenarët tragjikë që po dalin nga rezultatet e para të autopsive lidhur me tragjedinë familjare në Pietralata të Romës, ku u gjetën të pajetë Luca Abbasciano, 42 vjeç, Valentina Pambianco, 41 vjeç, dhe vajza e tyre Bianca, vetëm 5 vjeçe, e cila vuante nga një aftësi e rëndë e kufizuar.
Në duart e të dy prindërve janë gjetur gjurmë të mbetjeve të barutit. Ky është një element që lë të hapur mundësinë se si Abbasciano, ashtu edhe Pambianco mund të kenë përdorur pistoletën Glock, të cilën burri e posedonte në mënyrë të ligjshme, për të kryer tragjedinë.
Tre të shtëna
Ekzaminimet e kryera nga ekipi i mjekësisë ligjore, i koordinuar nga profesori Vittorio Fineschi, kanë evidentuar gjithsej tre plagë të shkaktuara nga të shtëna me armë zjarri. Vetëm njëri prej dy të rriturve kishte një plagë në tëmth, ndërsa prindi tjetër dhe e vogla Bianca ishin qëlluar në pjesë të tjera të kokës.
Nuk janë konstatuar shenja dhune që do të tregonin për një përleshje përpara të shtënave, ndërsa tre trupat ishin të shtrirë mbi krevatin bashkëshortor, me vajzën të vendosur në mes të babait dhe nënës. Mbetet ende për t'u sqaruar edhe koha dhe rendi në të cilin janë kryer të shtënat.
Hetimet e mëtejshme
Të dhëna të tjera mund të dalin nga analizat toksikologjike. Ekspertët po kërkojnë të përcaktojnë praninë e barnave, qetësuesve apo substancave të tjera. Hetuesit duan të përcaktojnë nëse, në momentin e tragjedisë, ndonjë prej viktimave ishte duke fjetur.
Edhe telefonat celularë të dy prindërve pritet të jenë vendimtarë për të kuptuar dinamikën dhe rrethanat në të cilat ndodhi tragjedia.
Telefoni i Abbascianos rezulton të jetë çaktivizuar rreth orës 23:00 të së shtunës, ndërsa mesazhi i fundit i dërguar nga Pambianco një miku daton në orën 19:15. /PiranjatNews/
