Tronditëse/ Irani transmeton videon ku pretendohet se Barron Trump është “plotësisht i monitoruar” dhe vendos një shpërblim për vrasjen e tij

Media shtetërore iraniane transmetoi një video rrëqethëse treminutëshe, ku fantazohej për vrasjen e Barron Trump, në një përshkallëzim shqetësues kundër Presidentit Trump dhe familjes së tij — ndërsa Teherani përgatitet për masa të tjera të ashpra ekonomike.

Videoja, e titulluar “Ku të vrasim Barron Trump?”, pretendohej se tregonte lëvizjet e djalit 20-vjeçar të Presidentit Trump, duke deklaruar se ai është “plotësisht i monitoruar”. Në video shfaqeshin edhe pamje të konvikteve të Qendrës Akademike Globale Constance Milstein & Family të Universitetit të Nju Jorkut (NYU), sipas një përkthimi të videos nga Euronews.

Videoja pretendonte gjithashtu se kishte zbuluar llogaritë e Barronit në Xbox, lojërat FIFA dhe Discord, si dhe ato të disa shokëve të tij të klasës, duke përmendur edhe dy prej tyre. Përveç videos shqetësuese, disa raportime pohuan se regjimi iranian kishte vendosur një shpërblim prej 10 milionë dollarësh për kokën e Barron Trump. The Postnuk ishte në gjendje të verifikonte në mënyrë të pavarur pretendimin për shpërblimin, pretendimet mbi lëvizjet e Barronit apo deklaratat për shokët e tij të klasës.

“Ky është vetëm fillimi! Barron Trump, na prit!”, përfundonte videoja.

Videoja shqetësuese, që kishte në shënjestër djalin më të vogël të presidentit, u shpërnda nga media të lidhura me Gardën Revolucionare Islamike të Iranit (IRGC), sipas medias së Lindjes së Mesme Al Bawaba.

Kjo vjen pas një tjetër videoje të publikuar në korrik nga media të lidhura me IRGC-në, ku agjencia Tasnim News publikoi një video të titulluar “Ku të vrasim Melania?”, e cila në mënyrë të ngjashme pretendonte se dinte vendndodhjen e Melania Trump.

Po atë muaj, në sheshin e Revolucionit Islamik në Teheran u shfaq një billboard ku presidenti amerikan paraqitej sikur kishte vdekur dhe ndodhej në një arkivol, me mbishkrimin në anglisht: “We Kill Trump” (“Ne e vrasim Trumpin”).

Media të mbështetura nga Irani publikuan gjithashtu një video të titulluar “Ku të vrasim Trumpin?!”, e cila në mënyrë të ngjashme pretendonte se paraqiste itineraret që ndiqte autokolona presidenciale gjatë udhëtimeve drejt dhe nga rezidencat e tij në Florida dhe Nju Jork.

Presidenti Trump ka qenë më parë objekt i kërcënimeve për atentat nga Irani, i cili ishte zemëruar pas sulmit amerikan me dron në janar 2020, që vrau gjeneralin e ndjerë iranian Qassem Soleimani. Tani Irani po përballet me pasojat e vdekjes së Udhëheqësit të tij Suprem, Ali Khamenei, në një sulm izraelit në shkurt.

Së fundmi, Trump ka shtuar presionin ndaj Iranit, ndërsa Sekretari i Thesarit, Scott Bessent, prezantoi një plan të quajtur “D-Day ekonomik”, me synimin për të goditur rëndë ekonominë e Teheranit, e cila tashmë është dëmtuar nga inflacioni i lartë dhe pasojat e një bllokade.

“Tani po hyjmë në fazën përfundimtare. Në agim fillon një D-Day ekonomik — ofensiva e vetme financiare më e madhe e mobilizuar ndonjëherë kundër një kundërshtari,” deklaroi Bessent.

Përpara zbatimit të masave ndëshkuese nga administrata Trump, monedha iraniane, rial-i, ra në një nivel rekord, duke u tregtuar me rreth 1.5 milionë rialë për një dollar.

Udhëheqës të lartë civilë në Iran, përfshirë Presidentin iranian Masoud Pezeshkian dhe kryetarin e parlamentit Mohammad Bagher Ghalibaf, ngritën alarmin për përkeqësimin e shpejtë të situatës ekonomike të vendit dhe javën e kaluar dukej se bënë thirrje publike për një marrëveshje me SHBA-në.

“Pavarësisht se sa fuqi ushtarake kemi, nëse njerëzit janë të uritur dhe nuk kemi qarkullim financiar dhe rritje ekonomike, nuk do të mbijetojmë,” paralajmëroi Ghalibaf.

Trump ka mburrur masat ndëshkuese ndaj Iranit, ndërsa administrata e tij ka deklaruar se ka arritur të kalojë anije përmes ngushticës së Hormuzit.

“IRANI PO SHEMBET PLOTËSISHT!!!”, shkroi Trump të hënën në Truth Social./Përktheu Piranjat News