Tronditëse/ Ushtari izraelit publikon palestinezin e lidhur dhe gjysmë të zhveshur

Një fotografi e publikuar fillimisht në rrjetet sociale nga një ushtar izraelit ka shkaktuar reagime të forta ndërkombëtare, pasi shfaq një palestinez nga Gaza të lidhur në sy, të shtrirë me fytyrë nga toka dhe të veshur vetëm me të brendshme. Organizatat për të drejtat e njeriut e cilësojnë imazhin si një provë të mundshme të keqtrajtimit të të burgosurve, duke paralajmëruar se rasti mund të përbëjë një krim lufte.

Fotografia u publikua fillimisht në një llogari personale në rrjetet sociale me mbishkrimin në hebraisht “Mirëmëngjesi”. Edhe pse postimi u fshi më vonë, imazhi u përhap me shpejtësi pasi u shpërnda nga aktivistë palestinezë.

Oneg Ben Dror, përfaqësues i organizatës Mjekët për të Drejtat e Njeriut në Izrael (PHRI), deklaroi se si keqtrajtimi i të burgosurve, ashtu edhe publikimi i fotografive poshtëruese të tyre, mund të përbëjnë krime lufte. Sipas tij, fotografia përforcon dëshmitë e mbledhura ndër vite nga ish-të burgosur palestinezë dhe organizata që monitorojnë respektimin e të drejtave të njeriut.

“Fotografia konfirmon atë që kanë treguar mijëra dëshmi të të burgosurve palestinezë. Qendrat izraelite të paraburgimit janë shndërruar në kampe torture për palestinezët,” u shpreh ai.

Reagim pati edhe nga Komiteti Publik Kundër Torturës në Izrael. Drejtoresha ekzekutive e organizatës, Sari Bashi, tha se mbajtja e një të burgosuri vetëm me të brendshme nuk mund të justifikohet me arsye sigurie dhe përbën shkelje të së drejtës ndërkombëtare.

“Lakuriqësia e detyruar, e ndjekur nga fotografimi dhe publikimi i këtyre pamjeve në rrjetet sociale, përbën një formë të dhunës seksuale dhe një krim lufte,” deklaroi ajo.

Forcat Mbrojtëse të Izraelit (IDF) konfirmuan autenticitetin e fotografisë dhe njoftuan se kanë nisur një hetim të brendshëm.

“Incidenti nuk është në përputhje me vlerat dhe rregulloret e IDF-së,” deklaroi një zëdhënës i ushtrisë izraelite.

Pas publikimit të fotografisë, të paktën dy nëna palestineze pretenduan se personi i paraqitur në imazh është djali i tyre.

Rana Abu Nasser tha se beson se bëhet fjalë për djalin e saj, Osama, i arrestuar në muajin mars pranë një zone të kontrolluar nga ushtria izraelite.

“Unë njoh çdo detaj të trupit të tij. Ai ka ënjtje në këmbë dhe të njëjtat shenja që pashë në fotografi,” tha ajo.

Një tjetër nënë, Joudeh al-Ghoul, deklaroi mes lotësh se në fotografi ndodhet djali i saj, Amin, i zhdukur që nga nëntori i vitit 2023.

“Është ai. E njoha nga flokët dhe mjekra. Zemra e një nëne e njeh gjithmonë fëmijën e saj,” u shpreh ajo.

Ushtria izraelite nuk ka konfirmuar identitetin e personit në fotografi dhe nuk ka bërë të ditur nëse ai ka marrë kujdes mjekësor apo nëse familja e tij është njoftuar.

Sipas organizatave për të drejtat e njeriut, autoritetet izraelite prej muajsh nuk kanë dhënë informacion për fatin e shumë palestinezëve të arrestuar në Gaza. Organizata HaMoked pretendon se qindra persona vijojnë të rezultojnë të zhdukur, ndonëse arrestimi i tyre është dokumentuar nga dëshmitarë okularë.