Ambasadori i SHBA-së në OKB, Mike Waltz, tha se “dera është e hapur” që Irani të kthehet në negociata për ...
BOTA
Trump do ta presë personalisht, por sytë do të jenë te Xi/ Thashethemet rreth shëndetit të tij, darka gala e anuluar dhe hapi i ngurtë
PiranjatPërditësimi i fundit 21 Shtator 2026, 19:21
Pekini ka konfirmuar se lideri kinez do të jetë në Washington nga 23 deri më 25 shtator, për të kthyer vizitën që presidenti amerikan zhvilloi në maj. Diplomacia kineze ka deklaruar se është e gatshme të bashkëpunojë me Shtetet e Bashkuara për të ndërtuar një “stabilitet strategjik” dhe për të menaxhuar mosmarrëveshjet mes dy vendeve.
Por, përveç marrëdhënieve SHBA-Kinë, këtë herë vëmendje të veçantë kanë marrë edhe pyetjet dhe spekulimet për shëndetin e Xi Jinping, i cili në qershor mbushi 73 vjeç.
Pas një periudhe kur kishte reduktuar ndjeshëm udhëtimet jashtë vendit, Xi ka rifilluar një aktivitet të ngjeshur diplomatik. Ai ka vizituar Kirgistanin, Egjiptin dhe Indinë, duke u përpjekur të tregojë një Kinë aktive dhe të fortë në skenën ndërkombëtare, në një kohë kur administrata Trump po përballet me zhvillime të shumta në politikën e jashtme.
Megjithatë, gjatë këtyre udhëtimeve kanë lindur edhe disa pikëpyetje për gjendjen fizike të liderit kinez.
Gjithçka nisi më 30 gusht, në Bishkek të Kirgistanit, ku Xi zbriti nga avioni së bashku me bashkëshorten e tij, Peng Liyuan. Në pamjet e transmetuara nga televizioni kirgiz, ai dukej sikur mbështetej disi te dora e bashkëshortes ndërsa zbriste shkallët, ndërsa hapat i kishte disi të ngurtë. Pamjet nuk u transmetuan në mënyrë të plotë nga televizioni shtetëror kinez.
Kjo mjaftoi që disa kundërshtarë të regjimit kinez, të cilët jetojnë jashtë vendit, të nisnin në rrjetet sociale spekulime për moshën dhe shëndetin e Xi. Megjithatë, nuk ka prova që kjo skenë të lidhet me ndonjë problem shëndetësor dhe është krejt e mundshme që një person në të 70-at të jetë thjesht i kujdesshëm gjatë zbritjes së shkallëve të avionit.
Spekulimet u shtuan gjatë vizitës së Xi në New Delhi, ku ai mori pjesë në samitin e vendeve BRICS.
Më 12 shtator, gjatë një takimi të liderëve të BRICS, kryeministri indian Narendra Modi ndërpreu fjalën për të pyetur: A është gjithçka në rregull?
Menjëherë në rrjetet sociale u përhapën pretendime se Modi kishte vënë re një problem shëndetësor te Xi.
Por më pas u sqarua se pyetja e Modit nuk kishte lidhje me ndonjë shqetësim shëndetësor. Xi kishte sinjalizuar një problem me kufjen e përdorur për përkthimin simultan dhe situata u zgjidh shpejt.
Një tjetër episod ndodhi po atë mbrëmje, kur Xi nuk mori pjesë në darkën zyrtare të organizuar për liderët e BRICS. Kjo solli menjëherë spekulime të tjera në rrjetet sociale, madje edhe pretendime se ai kishte pësuar goditje në tru.
Autoritetet kineze nuk dhanë një shpjegim të detajuar për mungesën e tij. Nga ana tjetër, diplomacia indiane i cilësoi pretendimet për probleme serioze shëndetësore si “fake news”, duke thënë se Xi ishte kthyer në hotel për të pushuar pas angazhimeve të shumta.
Disa burime anonime pretenduan se ai mund të kishte pasur një problem të lehtë shëndetësor, ndoshta të lidhur me ushqimin. Megjithatë, këto pretendime nuk janë konfirmuar zyrtarisht.
Të nesërmen në mëngjes, Xi u ngjit vetë në avion dhe u kthye në Pekin, pa pasur nevojë për ndihmë. Kjo sugjeron se, nëse kishte pasur ndonjë shqetësim, ai nuk dukej të ishte serioz.
Bill Bishop, autor i newsletter-it Sinocism, ka theksuar se thashetheme të tilla për shëndetin e liderëve kinezë përsëriten shpesh dhe se dezinformimi përfundon duke u besuar nga shumë njerëz.
Edhe Wall Street Journal ka analizuar së fundmi disa nga pamjet dhe spekulimet rreth shëndetit të Xi, duke kërkuar mendimin e Dennis Wilder, ish-analist i lartë i CIA-s për Kinën.
Wilder ka përmendur disa të dhëna të raportuara për stilin e jetesës së Xi, duke thënë se ai pi duhan larg kamerave, është mbipeshë, nuk ushtron më rregullisht dhe konsumon alkool. Sipas Wilder, ish-ministri i Jashtëm kinez Qin Gang i kishte treguar se Xi gjatë fluturimeve konsumonte moutai, një pije alkoolike tradicionale kineze shumë e fortë.
Tashmë, vëmendja është përqendruar te takimi i ardhshëm Trump-Xi në Washington. Sipas raportimeve, Trump dëshiron ta presë personalisht Xi në momentin e mbërritjes, duke i dhënë një atmosferë të veçantë takimit ku pritet të diskutohen tregtia, inteligjenca artificiale dhe krizat ndërkombëtare.
Këtë herë, përveç bisedimeve mes dy liderëve, vëmendja e analistëve dhe vëzhguesve të Kinës do të jetë edhe te mënyra se si Xi do të zbresë nga avioni./Corriere della Sera
