Trump kërkon Gianni Infantinon në krye të OKB-së? New York Post zbulon lëvizjet e dyshimta pas largimit të Guterres

Presidenti amerikan Donald Trump po shqyrton mundësinë që presidenti i FIFA-s, Gianni Infantino, të jetë një kandidat për postin e Sekretarit të Përgjithshëm të Kombeve të Bashkuara, sipas një raportimi të New York Post që citon burime pranë Shtëpisë së Bardhë.

Sipas këtyre burimeve, Trump beson se Infantino mund të sjellë një ndryshim të rëndësishëm në drejtimin e organizatës ndërkombëtare dhe e sheh atë si një figurë me prestigj global të mjaftueshëm për të zëvendësuar Antonio Guterres, mandati i të cilit përfundon më 31 dhjetor.

Procesi për zgjedhjen e kreut të ri të OKB-së ka nisur tashmë, ndërsa kandidati përfundimtar duhet të marrë miratimin e Këshillit të Sigurimit të Kombeve të Bashkuara, i përbërë nga 15 anëtarë. Ideja për të propozuar Infantinon lidhet me marrëdhënien e afërt që dy figurat kanë ndërtuar vitet e fundit, veçanërisht pas rikthimit të Trump në Shtëpinë e Bardhë në janar 2025.

Marrëdhënia e tyre u bë më e dukshme gjatë Kupës së Botës 2026, e organizuar nga SHBA-ja, Meksika dhe Kanadaja. Më herët këtë vit, Infantino i dha Trumpit çmimin e parë “FIFA Peace Prize – Football Unites the World”, duke vlerësuar, sipas FIFA-s, përpjekjet e tij për arritjen e armëpushimeve dhe marrëveshjeve të paqes. Aleanca mes Trump dhe Infantinos është përballur edhe me kritika, sidomos pas një episodi gjatë Kupës së Botës.

Pas ndeshjes mes SHBA-së dhe Bosnjë-Hercegovinës, sulmuesi amerikan Folarin Balogun u ndëshkua me karton të kuq për një ndërhyrje të rëndë dhe u pezullua për një ndeshje, çka do ta pengonte të luante në sfidën e radhës ndaj Belgjikës. Megjithatë, FIFA vendosi të pezullojë dënimin e tij, një vendim që shkaktoi reagime të forta, pasi erdhi menjëherë pas një telefonate mes Donald Trump dhe Gianni Infantinos.

Vendimi solli kritika ndërkombëtare. Disa eurodeputetë kërkuan hetim mbi veprimet e presidentit të FIFA-s, ndërsa organizata të të drejtave të njeriut ngritën shqetësime për neutralitetin politik të federatës. Infantino e mbrojti vendimin, duke deklaruar se organet disiplinore të FIFA-s funksionojnë në mënyrë të pavarur, ndërsa pranoi se komunikon rregullisht me presidentin amerikan për çështje të ndryshme. Nëse kandidatura e Infantinos do të konkretizohet, ajo do të përbënte një nga lëvizjet më të pazakonta në historinë e garës për drejtimin e Kombeve të Bashkuara, duke sjellë një figurë nga bota e sportit në krye të diplomacisë globale.