Trump largohet fshehurazi nga Turqia pas samitit të NATO-s, ndryshon avionin për shkak të kërcënimit nga Irani

Presidenti amerikan Donald Trump u largua fshehurazi nga Turqia pas samitit të NATO-s, në një operacion të pazakontë sigurie që dyshohet se u ndërmor për shkak të një kërcënimi për vrasje nga Irani. Trump fillimisht u shfaq para kamerave duke hipur në avionin e vjetër presidencial Air Force One, me të cilin ishte njoftuar se do të udhëtonte drejt Britanisë së Madhe. Por, pak çaste më vonë, presidenti u largua në mënyrë të fshehtë nga avioni.

Sipas raportimeve nga mediat e huaja, Trump u transportua përmes një kamioni të shërbimit të ushqimit të aeroportit dhe më pas hipi në një avion tjetër, një Air Force C-32A, i cili u përdor për fluturimin drejt Britanisë. Operacioni u zhvillua në një kohë kur tensionet mes SHBA-së dhe Iranit ishin përshkallëzuar ndjeshëm. Për shkak të kërcënimeve të sigurisë, autoritetet amerikane dyshohet se ndryshuan në mënyrë të papritur planin e udhëtimit të presidentit.

Në Ankara, Trump kishte mbërritur me avionin e ri presidencial të dhuruar nga Katari, i cili ishte përdorur për herë të parë në një udhëtim ndërkombëtar. Megjithatë, ai vendosi të mos e përdorte atë për t’u larguar nga Turqia. Para nisjes, Trump kishte deklaruar se do të udhëtonte me avionin e vjetër Air Force One, duke e cilësuar vendimin si një rikthim për hir të kohërave të vjetra.

Avioni i ri do të udhëtonte gjithashtu drejt bazës ajrore RAF Mildenhall në Britani, ku personeli ushtarak amerikan do të kishte mundësi ta vizitonte. Ndryshimi i papritur i avionit dhe mënyra e pazakontë e largimit të Trump nga avioni presidencial u mbajtën sekret, ndërsa masa besohet se kishte për qëllim të vështirësonte çdo përpjekje për ta gjurmuar ose sulmuar presidentin amerikan.