Turistja plagoset rëndë nga një avion

Një turiste 52-vjeçare italiane është plagosur rëndë në ishullin grek të Skiathosit, pasi u përfshi nga rryma e fortë e ajrit të shkaktuar nga turbinat e një avioni gjatë ngritjes nga aeroporti. Sipas ERT, gruaja pësoi dëmtime të rënda në kokë dhe u transportua fillimisht në Spitalin e Përgjithshëm të Skiathosit, ku iu nënshtrua një skaneri CT.

Për shkak të gjendjes së saj, pak pas orës 18:00 ajo u transportua me helikopter në Spitalin e Volosit për trajtim të mëtejshëm. Autoritetet po hetojnë rrethanat e incidentit dhe mënyrën se si turistja u ekspozua ndaj rrymës së fuqishme të ajrit të avionit.

Aeroporti i Skiathosit është i njohur për afrimin shumë të ulët të avionëve pranë plazheve dhe rrugëve, një spektakël që tërheq çdo vit turistë, por që mbart edhe rreziqe serioze për personat që afrohen pranë pistës. /PiranjatNews/