U bllokuan në Kanionet e Gjipesë, shpëton turisti holandez dhe dy të mitur

Një turist nga Holanda, së bashku me dy fëmijët e tij të mitur, u shpëtuan mbrëmjen e së martës pasi mbetën të bllokuar në një prej zonave më të vështira të Kanioneve të Gjipesë, në Dhërmi.

Pas sinjalizimit, Policia e Shtetit organizoi një operacion kërkim-shpëtimi, ku u angazhuan efektivët e Stacionit të Policisë Dhërmi në bashkëpunim me forcat e Repartit Special “Delta Forcë”.

Ndërhyrja zgjati rreth katër orë dhe u zhvillua në kushte të vështira, për shkak të terrenit të thyer dhe errësirës.

Pas lokalizimit, turisti dhe dy fëmijët u evakuuan të sigurt, pa pësuar lëndime.

Pas shpëtimit, ata morën ndihmën e parë mjekësore dhe u konstatua se ishin në gjendje të mirë shëndetësore.