Nga data 2 nëntor, shërbimi i dializës realizohet përmes OSHIS, shoqërisë shtetëtore që u ngrit fillimisht për ofr...
BOTA
Ukraina dhe Rusia drejt negociatave të reja/ Budanov: Bisedimet mund të rifillojnë në fund të shtatorit
PiranjatPërditësimi i fundit 4 September 2026, 21:39
Ukraina mund të rifillojë në fund të shtatorit negociatat me Rusinë për t’i dhënë fund luftës. Procesi pritet të ndërmjetësohet nga Shtetet e Bashkuara, ndërsa ditët e ardhshme mund të sjellin një tjetër përpjekje diplomatike mes palëve.
Shefi i Zyrës së Presidentit ukrainas, Kyrylo Budanov, tha për The New York Times se bisedimet mund të rikthehen në tryezë gjatë javëve të fundit të shtatorit.
Sipas tij, procesi mund të nisë me takime të nivelit të lartë mes përfaqësuesve amerikanë dhe drejtuesve të Rusisë dhe Ukrainës.
Në këtë përpjekje janë përfshirë të dërguarit e presidentit amerikan Donald Trump, Steve Witkoff dhe Jared Kushner. Dy përfaqësuesit amerikanë pritet të udhëtojnë këtë fundjavë drejt Moskës dhe Kievit për takime me krerët e dy vendeve.
Sipas Axios, Witkoff dhe Kushner pritet të takohen të shtunën me presidentin rus Vladimir Putin në Kremlin, ndërsa të dielën me presidentin ukrainas Volodymyr Zelensky në Kiev. Kjo do të jetë vizita e tyre e parë në Kiev që prej rikthimit të Trump në Shtëpinë e Bardhë.
Takimet synojnë të krijojnë terrenin për rikthimin e negociatave direkte mes Moskës dhe Kievit dhe të vlerësojnë nëse ka hapësirë për një marrëveshje.
Megjithatë, rruga drejt një marrëveshjeje mbetet e vështirë. Reuters raporton se SHBA po kërkon garanci sigurie nga të dyja palët për vizitën e të dërguarve amerikanë, ndërsa luftimet dhe sulmet ajrore mes Rusisë dhe Ukrainës vijojnë.
Budanov ka bërë të ditur gjithashtu se kushtet për një armëpushim mund të mos krijohen para pranverës së vitit të ardhshëm.
