Vajza e vogël ngec në rrjetën e peshkimit, prindërit dhe motra hyjnë për ta shpëtuar. Përpjekja përfundon fatalisht për 3 prej tyre

Ata ishin duke notuar së bashku si familje, kur vajza më e vogël u ngatërrua në një rrjetë peshkimi. Prindërit dhe motra e saj më e madhe u përpoqën dëshpërimisht ta shpëtonin, por u rrëmbyen nga rrymat e forta të detit dhe u mbytën. Ekipet e shpëtimit arritën ta nxirrnin vajzën e vogël nga uji, ndërsa ajo ndodhet në gjendje kritike në spital.

Tragjedia ndodhi në Shoreham Fort, pranë Brightonit, në West Sussex, në bregdetin jugor të Britanisë së Madhe.

Ardhja e ndihmës

Sipas raportimeve të mediave kryesore britanike, përfshirë The Sun, ekipet e shpëtimit u njoftuan nga peshkatarë që kishin parë një grup njerëzish në vështirësi në ujë, të martën pasdite.

Misioni i shpëtimit reagoi menjëherë, duke përdorur helikopterë dhe anije për të kërkuar familjen. Pasi i gjetën, ekipet e shpëtimit i nxorën nga uji dhe u përpoqën t'u jepnin ndihmën e parë dhe t'i ringjallnin, por për prindërit dhe vajzën e madhe përpjekjet rezultuan të pasuksesshme.

Si ndodhi tragjedia

Sipas disa dëshmitarëve okularë, familja kishte hyrë në Kanalin Anglez për të notuar së bashku, pavarësisht detit të trazuar.

Pas pak kohësh, prindërit dhe vajza e tyre adoleshente vunë re se vajza e vogël ishte në vështirësi. Hetuesit dyshojnë se këmba e saj ishte ngecur në një rrjetë peshkimi, duke e penguar të dilte në sipërfaqe.

Prindërit dhe motra e saj e madhe u futën në ujë për ta shpëtuar, por u përballën me rryma të forta. Të tre humbën jetën në përpjekje për ta shpëtuar vajzën, e cila u nxor e gjallë nga uji dhe u transportua në spital në gjendje kritike. /PiranjatNews/