Vdekja e Ratko Mladiç/ Haga i përgjigjet Beogradit: Kujdesi ndaj tij tejkaloi standardet minimale ndërkombëtare

Mekanizmi Rezidual Ndërkombëtar për Tribunalet Penale në Hagë i është përgjigjur kritikave të Beogradit pas vdekjes së Ratko Mladiç, duke deklaruar se ish-komandanti i forcave serbe të Bosnjës mori kujdes mjekësor që tejkalonte standardet minimale ndërkombëtare.

Sipas autoriteteve të Hagës, hetimi për rrethanat e vdekjes së Mladiç është ende në zhvillim dhe për momentin nuk mund të jepen detaje të mëtejshme, përfshirë edhe datën se kur trupi i tij do t’u dorëzohet autoriteteve serbe. Pas vdekjes së tij, presidentja e Mekanizmit, Graciela Gatti Santana, urdhëroi nisjen e një hetimi dhe caktoi gjyqtarin Ian Bonomy për të shqyrtuar rrethanat e ngjarjes. Hetimi nisi menjëherë pas njoftimit për vdekjen e Mladiç më 27 gusht.

Sipas raportimeve nga mediat e huaja, në një përgjigje paraprake për kujdesin që ai kishte marrë gjatë qëndrimit në qendrën e paraburgimit, Haga tha se trajtimi mjekësor dhe asistenca e ofruar, përfshirë ndihmën për aktivitetet e përditshme, tejkaluan ndjeshëm minimumin e kërkuar nga standardet ndërkombëtare. 

Reagimi vjen pas kritikave të presidentit serb Aleksandar Vuçiç, i cili e akuzoi Hagën për sjellje të pacivilizuar dhe kritikoi faktin që Mladiç nuk u lejua të kthehej në Serbi për të kaluar ditët e fundit të jetës pranë familjes.  Ratko Mladiç, i dënuar me burgim të përjetshëm për gjenocid, krime kundër njerëzimit dhe krime lufte gjatë luftës në Bosnje, vdiq në moshën 84-vjeçare në një spital në Hagë, ku po vuante dënimin. Ai u dënua për rolin e tij në rrethimin e Sarajevës dhe masakrën e Srebrenicës në vitin 1995, ku u vranë më shumë se 8 mijë burra dhe djem boshnjakë.