Veteranët e luftës bëhen “elita e re” e Putinit

Gati 50 veteranë të pushtimit rus të Ukrainës pritet të hyjnë në parlamentin e Rusisë, duke marrë një rol të ri në sistemin politik të presidentit Vladimir Putin pas rezultatit më të mirë elektoral të partisë Rusia e Bashkuar.

Partia e mbështetur nga Putin pritet të ketë marrë rreth 58 për qind të votave dhe do të çojë 49 veteranë të luftës në Dumën e Shtetit, dhomën e ulët të parlamentit, sipas sekretarit të përgjithshëm të partisë, Vladimir Yakushev.

Prania e tyre është pjesë e përpjekjes së Kremlinit për t’i dhënë veteranëve një rol më të madh në strukturat shtetërore, më shumë se katër vjet e gjysmë pasi Putin urdhëroi pushtimin e plotë të Ukrainës në vitin 2022. Shumë prej tyre kanë shërbyer në njësi që Ukraina i ka akuzuar për krime lufte.

Më shumë se 100 veteranë kanë përfunduar programin “Koha e Heronjve”, të drejtuar nga Kremlini dhe të modeluar sipas shkollave perëndimore të politikave publike. Ish-ushtarakët trajnohen për çështjet e administrimit shtetëror dhe më pas marrin poste të nivelit të mesëm në ministri, kompani shtetërore dhe qeverisjen rajonale.

Putin i ka përshkruar veteranët si një “elitë të re”. Analistët e cituar nga Financial Times e shohin promovimin e tyre edhe si një mënyrë për të forcuar legjitimitetin e luftës, duke ruajtur njëkohësisht kontrollin e Kremlinit mbi procesin politik.

Zgjedhjet e javës së kaluar ishin të parat parlamentare në Rusi që prej fillimit të pushtimit në vitin 2022. Gjykata e Lartë ruse hoqi nga fleta e votimit Yabloko-n, të vetmen parti që kishte shprehur një qëndrim, ndonëse të moderuar, kundër luftës.

Megjithatë, mbetet e paqartë se sa prej rreth 200 veteranëve që kandiduan do të përfundojnë realisht në parlament. Rusia e Bashkuar fillimisht deklaroi se 86 veteranë do të merrnin mandate, përpara se ta korrigjonte shifrën në 49.

Sipas politologut Mikhail Komin, përvoja nga zgjedhjet e niveleve më të ulëta tregon se kandidatët veteranë nuk gëzojnë domosdoshmërish mbështetje të veçantë mes votuesve.

“Ata janë në lista jo sepse përmirësojnë perspektivën elektorale të partisë, por sepse kjo është një mënyrë për të përmbushur thirrjen e Putinit për t’i kthyer veteranët e luftës në një elitë të re”, tha Komin.