VIDEO/ Aksidenti i frikshëm, dy automjete me shpejtësi skëterrë përplasen me vitrinën e dyqanit ndërsa kalimtari ecte pranë

Një incident i frikshëm ndodhi mbrëmjen e së martës në Nju Jork, kur dy makina u përplasën me shpejtësi të madhe në një ndërtesë, ndërsa për pak sa nuk goditën edhe një këmbësor. Nga përplasja mbetën të plagosur dy drejtuesit e automjeteve, të cilët më pas u arrestuan, si edhe këmbësori.

Një video e regjistruar nga kamera e sigurisë së një ndërtese tregon momentin kur një 20-vjeçar, i veshur me tuta blu, po ecte në rrugën Fulton në lagjen Bedford-Stuyvesant. Në momentin e fundit ai arrin të largohet nga rruga për të shmangur përplasjen nga automjetet.

Sipas policisë, një Cadillac i zi dhe një BMW dyshohet se kaluan me semafor të kuq pas një konflikti mes tyre, duke shkaktuar përplasjen e rëndë. Sipas informacioneve të New York Post, që citon burime policore, drejtuesi 56-vjeçar i Cadillac-ut, Anthony Hayes, akuzohet për shkaktim dëmtimi trupor me automjet, drejtim të mjetit nën efektin e alkoolit, rezistencë ndaj arrestimit, vënie të pakujdesshme të jetës në rrezik, drejtim të mjetit nën efektin e alkoolit me rrethana rënduese dhe drejtim të rrezikshëm.

Ndërkohë, drejtuesi 43-vjeçar i BMW-së, Robert Walker, akuzohet për shkaktim dëmtimi trupor me automjet, dëmtim të pronës së tjetrit dhe kalim me semafor të kuq. Të plagosurit ndodhen në spital dhe gjendja e tyre raportohet e qëndrueshme.

“Është thjesht tronditëse dhe dëmet janë të mëdha”

Aksidenti automobilistik shkaktoi dëme të rënda materiale në një studio jogaje në ndërtim, e cila ishte planifikuar të hapej më 1 gusht. Megjithatë, kjo datë tashmë është shtyrë, siç bëri të ditur pronari i studios për News12.

“Është e tmerrshme. Është thjesht tronditëse dhe dëmet janë të mëdha. Pyes veten, si mundi të ndodhte diçka e tillë?”, tha pronari i studios, duke shprehur tronditjen pas përplasjes së automjeteve në ndërtesë. /PiranjatNews/