VIDEO/ Dronët ukrainas shkatërrojnë sistemin mburojë të ‘sarajit” të Putinit me vlerë 1 miliard paund

Një sistem kundërajror i cili, i cili ishte vendosur për të mbrojtur rezidencën e madhe luksoze që lidhet me Vladimir Putinin në Rusinë perëndimore, u shkatërrua nga dronë ukrainas. Sulmi kishte në shënjestër një instalim të sistemit kundërajror S-400 «Triumph», i cili ndodhet rreth 12 milje – afërsisht 19 kilometra – nga kompleksi me arkitekturë italiane që i atribuohet presidentit rus, pranë Gelendzhikut, një zonë turistike në krajinën e Krasnodarit, në bregdetin e Detit të Zi. Sipas majorit Robert Brovdi, komandant i forcave ukrainase të sistemeve pa pilot, lëshuesi që ishte objektivi i sulmit mbeti «në flakë dhe vazhdoi të shpërthente për tre orë» pas goditjes.

Nga mbrojtja te sulmet ndaj qyteteve ukrainase

Instalimi që u shkatërrua ishte pjesë e një rrjeti shumë-shtresor mbrojtjeje, i cili përfshin sisteme të luftës elektronike dhe njësi të lëvizshme zjarri. Ky rrjet mbron një zonë sigurie me sipërfaqe rreth 27 milje katrorë rreth rezidencës, mbi të cilën është vendosur një zonë e përhershme ndalim-fluturimi.

Burime ushtarake në Kiev deklaruan se forcat ruse e kishin shndërruar këtë sistem të mbrojtjes ajrore edhe në një armë sulmuese, duke e përdorur për të lëshuar gjashtë raketa kundër qendrave urbane ukrainase më 8 gusht.

«Edhe pse janë më pak të sakta dhe më pak vdekjeprurëse, ato vazhdojnë të përbëjnë një kërcënim për infrastrukturën civile, veçanërisht kur lëshohen kundër zonave me popullsi të dendur», shkroi Fabian Hoffmann, ekspert për raketat në Universitetin e Oslos. Sipas tij, Moska po përdor sisteme dytësore armatimi për shkak të kufizimeve me të cilat përballet në lidhje me kapacitetet e saj balistike.

Kompleksi i Gelendzhikut dhe masat e sigurisë

Vlera e kompleksit në Gelendzhik është vlerësuar deri në 1 miliard paund, sipas një hetimi të publikuar në vitin 2021 nga Fondacioni për Luftën kundër Korrupsionit i Aleksei Navalnyt.

Sipas hetimit, kompleksi përfshin, ndër të tjera, një kazino, vreshta, spa, një pistë patinazhi nëntokësore, ndërsa së fundmi i është shtuar edhe një kapelë.

Rreziqet në rritje për sigurinë dyshohet se kanë bërë që Vladimir Putin ta vizitojë rrallë këtë lokacion në bregun e Detit të Zi, duke preferuar fortesën e tij të mbrojtur fuqishëm pranë liqenit Valdaj, në lindje të Moskës.

Kjo rezidencë mbrohet nga të paktën 27 kulla të pajisura me sisteme kundërajrore Pantsir.

Paqëndrueshmëria në zonë u bë edhe më e dukshme javën e kaluar, kur mbetjet e dronëve ukrainas të interceptuar ranë në një plazh aty pranë, duke shkaktuar vdekjen e shtatë personave.

Fushatë e gjerë ukrainase me dronë

Operacioni në Gelendzhik është pjesë e një fushate më të gjerë ajrore ukrainase kundër sistemeve ruse të mbrojtjes ajrore dhe infrastrukturës në fronte të ndryshme.

Në Krimenë e pushtuar, shërbimi ukrainas i inteligjencës ushtarake njoftoi se kishte shkatërruar edhe dy lëshues të tjerë S-400, së bashku me një sistem antenash që përdorej për kontrollin e dronëve Orion, të operuar në lartësi mesatare.

Humbjet nga këto goditje vlerësohet se arrijnë në dhjetëra miliona dollarë.

Në një valë të veçantë sulmesh, më shumë se 450 dronë ukrainas me rreze të gjatë veprimi goditën gjatë natës deri të hënën objektiva në thellësi të territorit rus.

Mes objektivave ishte edhe një rafineri nafte në Tatarstan, ndërsa nga sulmet u vranë të paktën 13 persona. Mbetjet e dronëve arritën deri në rajonin e Tjumenit, në Siberi.

Pavarësisht përshkallëzimit të sulmeve ukrainase në thellësi të territorit rus, me Kievin që synon të rrisë presionin për përparim diplomatik, Moska vazhdon të refuzojë kushtet për një marrëveshje të menjëhershme paqeje.

“Asnjë ‘ngrirje’ nuk është e mundur pa u trajtuar shkaqet më të thella të kësaj krize”, deklaroi zëvendësministri i Jashtëm i Rusisë, Mikhail Galuzin, duke hedhur poshtë thirrjet për një armëpushim përgjatë vijave aktuale të frontit. /PiranjatNews/