Video/ E rëndë në Greqi, rrëzohet helikopteri në ishullin Sifnos; tre persona gjenden pa ndjenja

Një helikopter privat është rrëzuar pasditen e sotme, në ishullin Sifnos të Greqisë, ndërsa tre persona që ndodheshin në bord janë gjetur pa ndjenja.

Sipas raportimit të medias greke “Protothema”, helikopteri u rrëzua pak pas orës 18:00 në zonën Tholos, pranë platformës së uljes së helikopterëve. Menjëherë pas rrëzimit ka shpërthyer zjarr, duke sjellë ndërhyrjen e forcave zjarrfikëse dhe ekipeve të shpëtimit.

Helikopteri ka rënë pranë banesave, ndërsa zjarrfikësit që mbërritën në vendngjarje nisën ndërhyrjen për shuarjen e flakëve dhe menaxhimin e pasojave të aksidentit.

Sipas të dhënave të publikuara deri tani, tre persona janë gjetur pa ndjenja në helikopter. Autoritetet nuk kanë dhënë ende informacion të mëtejshëm për identitetin ose gjendjen e tyre. Qendra Operacionale e Departamentit të Zjarrfikësve u njoftua për rrëzimin rreth orës 18:17 të 17 gushtit.

Në operacion u angazhuan fillimisht dy zjarrfikës me një automjet, ndërsa autoritetet nisën nga Syros drejt Sifnos edhe një ekip shpëtimi me motoskafin RAFNAR të Departamentit të Zjarrfikësve.

Pamjet e publikuara nga media greke “To Pontiki” tregojnë momentet e para pas incidentit dhe tymin në zonën ku është rrëzuar helikopteri.

Deri tani autoritetet greke nuk kanë bërë të ditur shkakun e rrëzimit. Hetimet pritet të përcaktojnë rrethanat e fluturimit dhe dinamikën e aksidentit.