VIDEO/ Momenti nga grabitja spektakolare prej 7.7 milionë paund

Ky është momenti i pabesueshëm kur një bandë hajdutësh të maskuar bastisi një muze italian dhe vodhi një pikturë me vlerë 7.7 milionë paund në më pak se tre minuta. Kamerat e sigurisë tregojnë hajdutët e guximshëm teksa futen fshehurazi në muzeun e Fondacionit Magnani Rocca, pranë Parmës, në orët e vona të natës, më 22 mars.

Dy burra të maskuar shihen duke u futur përmes një dritareje me fenerët e kokës të ndezur, ndërsa një bashkëpunëtor tjetër i pret jashtë. Në një aksion jashtëzakonisht të shpejtë, banda shkëputi tre piktura nga “Dhoma Franceze” e muzeut, përpara se t’ua kalonte ato përmes dritares.

Brenda pak minutash, banda ishte zhdukur me veprat e artistëve Paul Cézanne, Pierre-Auguste Renoir dhe Henri Matisse. Por grabitja spektakolare është tashmë rikuperuar, pasi policia ndërhyri në banesën në Parma të një prej të dyshuarve. Tre kryeveprat u gjetën gjatë kontrolleve të kryera nga karabinierët e Komandës Provinciale të Parmës dhe Njësisë për Mbrojtjen e Trashëgimisë Kulturore.

Hetuesit besojnë se pikturat kishin qëndruar në banesën e të dyshuarit që prej grabitjes spektakolare. Nëntë persona, mes tyre edhe gra, janë aktualisht nën hetim për vjedhjen e guximshme dhe dyshimet për përfshirje në një komplot kriminal. Të dyshuarit raportohet se janë me origjinë moldave dhe besohet se janë pjesë e një bande hajdutësh me përvojë, ndonëse nuk janë specialistë të vjedhjeve të veprave të artit. /PiranjatNews/