VIDEO/ Pensioni, burri grek mban në frigorifer babanë e vdekur 90-vjeçar  

Rasti i zbuluar në Mystras të Greqisë është tronditës, pasi trupi i një burri 90-vjeçar u gjet brenda një frigoriferi komercial.

Gjithçka nisi kur autoritetet morën informacion për zhdukjen e të moshuarit, çka çoi në nisjen e një hetimi policor. Në kuadër të hetimit, djali i tij 55-vjeçar u thirr për të dhënë shpjegime, ndërsa policia zbuloi më pas trupin e 90-vjeçarit brenda një frigoriferi komercial në bodrum.

Në vendngjarje shkoi një mjek ligjor, i cili, sipas këqyrjes së parë, nuk konstatoi shenja të dukshme dhune apo lëndimesh në trup. Shkaqet e sakta të vdekjes pritet të sqarohen pas kryerjes së autopsisë.

55-vjeçari u arrestua dhe, sipas informacioneve, dyshohet se u ka thënë efektivëve të policisë se babai i tij kishte ndërruar jetë për shkaqe natyrore. Sipas pretendimeve të tij, ai e kishte vendosur trupin në frigorifer për të vazhduar të përfitonte pensionin e të ndjerit./PiranjatNews/