VIDEO/ Shoferi ndërmerr aktin makabër ndaj qenit që flinte

Një akt brutaliteti i pabesueshëm ndodhi në Korfuz në orët e para të së shtunës (22/08), ku viktimë ishte një qen që thjesht... flinte. Një shofer, në fshatin Avliotes, teksa po lëvizte në një rrugë të ngushtë, pa përpara tij qenin që po flinte dhe e përplasi me automjet.

Në pamjet e publikuara në Facebook, shihet automjeti që fillimisht ngadalëson, por më pas përplas qenin fatkeq. Kafsha nis të përpëlitet nga dhimbjet, duke u përpjekur të ngrihet, ndërsa disa sekonda më vonë jep frymën e fundit në rrugë.

Shoferi i automjetit, autori i këtij akti të shëmtuar, siç shihet në pamjet filmike, kupton se ka përplasur qenin dhe frenon menjëherë pas incidentit. Megjithatë, në vend që të ndihmojë kafshën fatkeqe, ai zgjedh të shtypë gazin dhe të largohet nga vendi i ngjarjes, duke e lënë të ngordhë e vetme në mes të rrugës.

Sipas informacioneve, autori është arrestuar nga oficerët e Stacionit të Policisë së Korfuzit të Veriut, ndërsa ndaj tij është ngritur një padi. Hetimi i autoriteteve për incidentin e rëndë vijon.