VIDEO/ Terror në Kinë! Qindra gjarpërinj, përfshirë kobra, ikën nga fermat e përmbytura

Alarmi është ngritur në Kinën jugore, ku qindra gjarpërinj, përfshirë kobra helmuese, kanë ikur nga fermat e shumimit pas përmbytjeve të mëdha të shkaktuara nga shirat e rrëmbyeshëm dhe kalimi i tajfunit Maysak.

Sipas  Guardian, duke cituar mediat shtetërore, një strukturë për shumimin e gjarpërinjve në qytetin Hangzhou, në Rajonin Autonom Guangxi Zhuang, u përmbyt pas ditësh shirash të rrëmbyeshëm, duke bërë që autoritetet të lëshojnë paralajmërime për banorët.

Një video e transmetuar nga mediat kineze dhe që është bërë virale tregon banorët duke përdorur kanalet e kullimit për të kapur gjarpërinjtë, ndërsa në njërën prej pamjeve një kobër duket duke nxjerrë kokën nga ujërat me baltë të përmbytjes. 

“Qindra gjarpërinj ikën menjëherë. Pashë pesë ose gjashtë”, tha një banor i shtruar në spital për Beijing News pas një pickimi gjarpri. Ai tha se u kafshua nga një kobër ndërsa pastronte mbeturinat nga kati përdhes i shtëpisë së tij në mesditën e së martës.

Një mjek vendas që merret me rastet e pickimit të gjarpërinjve tha se kishte trajtuar disa banorë që kur kaloi tajfuni.

Përmbytjet kanë shkaktuar probleme serioze në Guangxi, ku dy rezervuarë u mbushën dhe u dëmtuan, duke lënë fshatra të rrethuar nga uji. Të paktën gjashtë persona kanë vdekur, rreth 50,000 janë evakuuar nga shtëpitë e tyre dhe gjashtë janë ende të zhdukur.

Agjencia shtetërore e lajmeve Xinhua tha se numri i të vdekurve nga moti i keq në Kinë është rritur në 38, me një rrëshqitje toke në provincën Gansu që vrau 21 persona dhe stuhitë dhe tornadot në provincën Hubei që shkaktuan të paktën 11 vdekje. Gazeta Beijing News raportoi gjithashtu se një burrë që ishte kafshuar nga një gjarpër kishte vdekur, duke cituar burime spitalore dhe dëshmitarë okularë. 

Autoritetet lokale në Hangzhou kanë lëshuar udhëzime për parandalimin e kafshimeve nga gjarpërinjtë, duke paralajmëruar se specie helmuese si kobrat dhe nepërkat janë larguar për shkak të rritjes së niveleve të ujit.

Ata gjithashtu kanë rritur furnizimet me serum kundër gjarpërinjve dhe kanë krijuar një procedurë të veçantë reagimi të shpejtë në Spitalin Popullor të Hangzhou, i cili është caktuar si qendër trajtimi për kafshimet nga gjarpërinjtë.

Autoritetet paralajmërojnë se gjarpërinjtë mund të kërkojnë strehim në shtëpi, shkallë, cepa ndërtesash dhe brigje lumenjsh, duke u bërë thirrje qytetarëve të jenë shumë të kujdesshëm dhe të mos përpiqen t'i largojnë vetë./Piranjat News