VIDEO tronditëse/ Momenti i shembjes së akullnajës që shkaktoi efekt shkatërrimtar me qindra të vdekur

Pamje dramatike të publikuara nga Himalajet tregojnë përmasat e shembjes së një akullnajeje, fenomen që dyshohet se lidhet me përmbytjet masive që kanë goditur zona të Nepalit dhe Tibetit.

Në videot e publikuara shihet peizazhi pas shembjes, ku një pjesë e shpatit rezulton e zhveshur nga akulli dhe e mbuluar nga masa dheu dhe mbetjesh. Imazhet e mëparshme satelitore tregojnë se e njëjta zonë ishte e mbuluar nga akulli.

Pasojat e katastrofës janë të rënda. Sipas të dhënave të raportuara nga autoritetet dhe organizatat ndërkombëtare, qindra persona kanë humbur jetën, ndërsa 1,924 të tjerë rezultojnë të zhdukur. Mes personave që ende nuk janë gjetur raportohet se ka edhe turistë dhe pelegrinë të huaj.

Operacionet e kërkim-shpëtimit vazhdojnë në zonat e prekura. Mijëra pjesëtarë të forcave të sigurisë janë angazhuar në terren, ndërsa dronët po përdoren për kontrollin e zonave ku ndërhyrja nga toka konsiderohet tepër e rrezikshme.

Në disa prej territoreve më të goditura, fshatra të tëra janë përmbytur dhe dëmtuar brenda pak minutash. Pas tërheqjes së ujërave, zona të mëdha kanë mbetur të mbuluara nga balta dhe mbetjet, ndërsa shumë banorë kanë humbur shtëpitë.