Virusi i Nilit Perëndimor/ 51 raste në Maqedoninë e Veriut, rritet numri i viktimave

Një tjetër person ka vdekur në një spital të Shkupit pasi u infektua me virusin e Nilit Perëndimor në vend, duke e çuar numrin e të vdekurve nga kjo sëmundje në gjashtë.

Mediat e huaja raportojnë se, burri është një 72-vjeçar nga Shkupi, i cili ishte shtruar në spital për 15 ditët e fundit me një pamje të rëndë klinike. Në të njëjtën kohë, në vend po rritet shqetësimi për përhapjen e vazhdueshme të virusit, pasi autoritetet shëndetësore kanë regjistruar 51 raste të konfirmuara deri më sot, shumica e të cilave në zonën më të gjerë të Shkupit.

Shumica e pacientëve janë mbi 60 vjeç, ndërsa disa kanë paraqitur manifestime serioze të sistemit nervor qendror, siç janë encefaliti dhe meningjiti. Shpejtësia me të cilën po rriten rastet është gjithashtu shqetësuese. Në fund të korrikut, u regjistruan vetëm tetë raste, por brenda pak javësh numri i tyre është rritur në 51.

Ky zhvillim e bën shpërthimin e këtij viti një nga më seriozët me të cilët është përballur vendi që nga viti 2011, kur virusi i Nilit Perëndimor u regjistrua për herë të parë në Maqedoninë e Veriut. Për shkak të shpërthimit, autoritetet kanë shpallur gjendje epidemie në disa komuna në Shkup, duke forcuar programet e kontrollit të mushkonjave dhe mbikëqyrjen epidemiologjike.