Microsoft po ofron një plan të ri për largim vullnetar nga puna për rreth 60,000 punonjës në Shtetet e Bashkuara, Kanada, Indi dh...
BOTA
Vjedhja në Pallatin Elysee, sendet prej porcelani dhe argjendi me vlerë deri në 40 mijë euro përfundojnë për shitje në faqe online! 3 bien në pranga
PiranjatPërditësimi i fundit 23 December 2025, 16:51
Për një periudhë prej të paktën dy vitesh, objekte porcelani dhe argjendi që i përkisnin Presidencës Franceze, hiqeshin gradualisht nga magazinat e Pallatit Elysee dhe përfundonin ose në platforma online të shitjes, ose në duar private. Çështja çoi tre burra përpara drejtësisë, të akuzuar për vjedhje dhe pranimin e objekteve të vjedhura që përbëjnë pjesë të trashëgimisë kulturore.
Sipas gazetës Le Figaro, hetimi nisi pas një raportimi të brendshëm, kur u konstatuan mungesa të përsëritura të objekteve që përdoreshin në darka zyrtare ose ekspozoheshin në rezidencën presidenciale. Dëmi vlerësohet nga 15.000 deri në 40.000 euro. Fabrika e porcelanit Sèvres, furnizues historik i pallatit presidencial, identifikoi objekte të dyshimta për shitje në faqe të specializuara online, çka i çoi autoritetet te një punonjës i Presidencës.
I akuzuari kryesor është Tomas M., përgjegjës i mensës presidenciale dhe i objekteve prej argjendi. Sipas dosjes hetimore, ai bashkëpunonte me Damjan Z., administrator i një kompanie që merret me shitje online të enëve të tavolinës. Në një llogari shitësi në internet, që i atribuohet këtij të fundit, u gjetën objekte me vula zyrtare, të regjistruara dhe të numëruara, gjë që bëri të mundur identifikimin e tyre.
Të dy burrat u arrestuan më 16 dhjetor nga autoritetet e Parisit. Sipas të njëjtave burime, gjatë kontrolleve u gjetën rreth 100 objekte në ambiente personale, automjete dhe banesa. Mes tyre kishte enë të vjetra, gota Baccarat, objekte të René Lalique dhe porcelan Sèvres nga servise historike.
Në çështje është përfshirë edhe një i tretë i akuzuar, Gislen M., punonjës i Muzeut të Luvrit, i cili dyshohet se ka blerë një pjesë të objekteve të vjedhura. Presidenca Franceze ka rikuperuar pothuajse të gjitha objektet e vjedhura. Të tre të akuzuarit u dërguan përpara drejtësisë më 18 dhjetor. Ata përballen me dënime deri në 10 vite burg dhe gjoba që arrijnë deri në 150.000 euro. Seanca gjyqësore u shty për më 26 shkurt 2026, ndërsa deri atëherë të pandehurit janë vendosur nën mbikëqyrje gjyqësore me masa kufizuese.
