Zbulohet laborator droge brenda një apartamenti në Itali, vihen në pranga dy shqiptarë, sekuestrohen 15 kg kokainë

Një laborator droge, me 15 kilogramë kokainë dhe materiale e pajisje për paketimin e dozave, është zbuluar në një apartament në Giussano nga Karabinierët e Seregno në Itali. Sipas mediave italaine, operacioni çoi në arrestimin e dy shqiptarëve rreth 30 vjeç.

Karabinierët fillimisht ndaluan njërin prej shqiptarëve teksa po dilte nga porta e apartamentit dhe duke përdorur çelësat e tij, hynë në apartament, ku po flinte shqiptari tjetër. Gjatë operacionit është sekuestruar edhe sasia e madhe e kokainës.

Dy të dyshuarit e arrestuar u morën në pyetje nga gjyqtari hetues i Gjykatës së Monzës, për të vërtetuar arrestimet e tyre, informon “Il Giorno“. Shqiptari që u gjet duke fjetur në shtëpi ushtroi të drejtën e tij për të heshtur, ndërsa tjetri u përpoq ta shpjegonte praninë e tij në Giussano si të rastësishme.