5 të plagosurit kosovarë nga zjarri në hotelin e Vlorës/ Kurti: Jemi të tronditur

Kryeministri në detyrë i Kosovës, Albin Kurti ka reaguar në lidhje me ngjarjen e rëndë, ku një hotel u përfshi nga flakët në orët e para të mëngjesit të kësaj të diele në Vlorë.

Përmes një statusi në rrjetet sociale, Kurti shpreh tronditje për ngjarjen e rëndë, duke shtuar se po e monitorojnë nga afër gjendjen e qytetarëve të Kosovës.

Sipas Kurtit, Kosova është në komunikim të vazhdueshëm me autoritetet përkatëse në Shqipëri, ndërsa uroi shërim të shpejtë dhe të plotë, të lënduarve.

Reagimi:

Sot, në orët e hershme të mëngjesit, një zjarr përfshiu një hotel në Vlorë, ku si pasojë u lënduan katër shtetas të Republikës së Kosovës, tre prej të cilëve po marrin trajtim spitalor në Tiranë dhe një në Vlorë.

Jemi të tronditur nga lajmi dhe po e monitorojmë nga afër gjendjen e qytetarëve tanë, duke qenë në komunikim të vazhdueshëm me autoritetet përkatëse në Shqipëri. Të lënduarve u dëshiroj shërim të shpejtë dhe të plotë.