"Deklaratat e Vuçiçit janë kërcënuese"/ Haxhiu: Diplomatët të informojnë partnerët për rrezikun ndaj Ibrit

Ushtruesja e detyrës së Presidentes së Kosovës, Albulena Haxhiu, i ka cilësuar kërcënuese deklaratat e presidentit serb Aleksandër Vuçiç për mundësinë e ndryshimit të rrjedhës së lumit Ibër.

Në Konferencën e Ambasadorëve të Kosovës, Haxhiu kërkoi që diplomatët kosovarë të informojnë qeveritë e vendeve ku shërbejnë për pasojat që mund të ketë, sipas saj, një ndërhyrje e njëanshme në rrjedhat ujore ndërkufitare.

Ajo theksoi rëndësinë e sistemit Ibër-Lepenc dhe të liqenit të Ujmanit për furnizimin me ujë, energjinë dhe bujqësinë në Kosovë.

“Deklaratat e fundit të Vuçiçit për mundësinë e ndryshimit të rrjedhës së lumit Ibër janë një ide absurde sa edhe kërcënuese”, tha Haxhiu.
Sipas saj, një ndërhyrje e tillë nuk do të ishte thjesht një çështje teknike, por mund të prekë sigurinë ujore, energjetike, mjedisore dhe njerëzore të Kosovës.

Haxhiu u bëri thirrje diplomatëve që këto deklarata t’i përcjellin te qeveritë e vendeve pritëse dhe të kërkojnë vëmendje ndërkombëtare ndaj çështjes.

Ajo tha gjithashtu se përdorimi i burimeve ujore si instrument presioni ndaj Kosovës është i papranueshëm dhe kërkoi që çdo veprim që rrezikon burimet ujore të vendit të trajtohet në përputhje me parimet e së drejtës ndërkombëtare për ujërat ndërkufitare.