“Dera vazhdon të jetë e hapur”/ Djali i Jakup Krasniqit: Institucionet i presim prej gjashtë vitesh

Altin Krasniqi, djali i Jakup Krasniqit, ka reaguar përmes një postimi publik, duke thënë se dera e shtëpisë së familjes së tyre vazhdon të jetë e hapur për familjarë, miq dhe të gjithë ata që bashkëndiejnë dhimbjen e tyre.

Krasniqi ka bërë të ditur se prej gjashtë vitesh familja ka pritur edhe vizitën e përfaqësuesve të institucioneve të Kosovës.

“Dera e shtëpisë sonë vazhdon të qëndrojë e hapur, tash e 6 vjet, për familjarë, miq dhe për të gjithë ata që bashkëndiejnë dhimbjen tonë”, ka shkruar ai.

Sipas tij, gjatë kësaj periudhe familja ka pritur që në shtëpinë e tyre të vijnë edhe përfaqësues institucionalë.

“Përgjatë këtyre 6 viteve, kemi pritur që përfaqësues të institucioneve tona të vijnë në këtë shtëpi dhe ende vazhdojmë t’i presim. Sepse pjesë e ndërtimit të këtyre institucioneve janë edhe vepra dhe sakrifica e babait tim”, ka deklaruar Krasniqi.