Gjenden mbetje mortore në Zubin Potok, dyshohet se u përkasin 23 intelektualëve të Mitrovicës

Prej 14 ditësh, ekipet e mjekësisë ligjore dhe ekspertët po vijojnë gërmimet në disa lokacione në Zubin Potok, ku dyshohet se ndodhen varreza masive të personave të vrarë gjatë luftës së Kosovës.

Në zonën malore të Kalludrës së Vogël, rreth 17 kilometra larg Zubin Potokut, janë gjetur mbetje mortore, ndërsa autoritetet kanë identifikuar edhe dy lokacione të tjera të dyshuara, në fshatin Jabukë dhe pranë Kalludrës së Vogël.

Deri tani, në Kalludrën e Vogël janë gjetur 11 mbetje mortore, ndërsa në Jabukë janë identifikuar katër të tjera. Mbetjet janë konfirmuar edhe nga Komisioni Qeveritar për Personat e Zhdukur, ndërsa identifikimi i viktimave ende nuk ka përfunduar.

Dyshimet kryesore janë se mbetjet mund t’u përkasin grupit prej 23 intelektualësh të Mitrovicës, të zhdukur gjatë vitit 1999.

Për familjarët e personave të zhdukur, gjetjet kanë rikthyer shpresën se pas më shumë se dy dekadash mund të zbardhet fati i të afërmve të tyre dhe të kenë më në fund një vend ku t’i varrosin.

Lutfije Ademi-Vokshi, motra e mjekut Adem Ademi, i zhdukur në vitin 1999, thotë se pritja për identifikimin e viktimave është e vështirë, por shprehet e bindur se në këtë lokacion mund të jenë gjetur anëtarë të grupit të 23 intelektualëve.

“Janë shumë të rënda këto pritjet e kohëve të fundit derisa zyrtarisht të kuptohet se kush do të gjindet e kush jo. Unë jam e bindur që aty është grupi i vëllait tim. Është grupi i 23 intelektualëve të Mitrovicës”, tha ajo.

Ademi-Vokshi, e cila drejton organizatën “Ndriçimi i Jetës” dhe prej vitesh angazhohet për zbardhjen e fatit të personave të zhdukur, bëri të ditur se në dy lokacionet janë gjetur gjithsej 15 mbetje mortore.

Ndërkohë, për rastin janë arrestuar tre persona në Zubin Potok, të dyshuar për kryerjen e veprës penale të krimeve të luftës.

Identifikimi përmes analizave mjeko-ligjore pritet të përcaktojë nëse mbetjet e gjetura u përkasin personave të zhdukur gjatë luftës dhe nëse mes tyre ndodhen 23 intelektualët e Mitrovicës.