Haradinaj kërkon ndarje të pushtetit, Vetëvendosje përballet me dilemën mes kryeministrit dhe presidentit

Një ditë para seancës konstituive të Kuvendit të Kosovës, partitë politike ende nuk kanë një marrëveshje të qartë për formimin e institucioneve të reja.

Lëvizja Vetëvendosje, si fituese e zgjedhjeve, ka mundësinë të konstituojë Kuvendin dhe të tentojë formimin e qeverisë, por për zgjedhjen e presidentit kërkohet një mbështetje më e gjerë politike.

Nëse nuk arrihet zgjedhja e presidentit, Kosova mund të përballet me një proces të ri zgjedhor.

Ish-kreu i Aleancës për Ardhmërinë e Kosovës, Ramush Haradinaj, u shpreh se rezultati i zgjedhjeve të 7 qershorit ka treguar se asnjë forcë politike nuk mund të krijojë e vetme institucionet. Sipas tij, Vetëvendosje duhet të bëjë një zgjedhje mes postit të kryeministrit dhe atij të presidentit.

Haradinaj ka kërkuar që opozita të përfshihet në procesin e vendimmarrjes për të kontribuar në krijimin e institucioneve.

Ndërkohë, Nenad Rashiq, partneri i deritanishëm i kryeministrit Albin Kurti, ka bërë të ditur se në seancën e së enjtes pritet të konstituohet vetëm Kuvendi.

Kurti zhvilloi të martën një takim me kryetarin e Lidhjes Demokratike të Kosovës, Lumir Abdixhiku, por bisedimet nuk sollën një marrëveshje për formimin e institucioneve të reja.