Kurti kërkon kohë për marrëveshje politike, ende pa emër për kryetarin e Kuvendit

Kryetari i Vetëvendosjes, Albin Kurti ka kërkuar më shumë kohë për vijimin e konsultimeve me partitë politike në Kosovë, pa propozuar ende një emër për postin e kryetarit të Kuvendit.

Gjatë seancës së Kuvendit, Kurti deklaroi se pas certifikimit të rezultateve zgjedhore kanë nisur takimet me përfaqësuesit e subjekteve të tjera politike dhe se procesi kërkon kohë për të arritur marrëveshje.

Kurti theksoi se bisedimet nuk lidhen vetëm me zgjedhjen e kryeparlamentarit, por edhe me çështje të tjera të rëndësishme institucionale, përfshirë zgjedhjen e Presidentit të ardhshëm të Kosovës.

“Menjëherë pas certifikimit të rezultateve filluam takimet. Falënderoj Bedri Hamzën e PDK-së dhe Lumir Abdixhikun e LDK-së për takimet. Zgjedhjet e shtatë qershorit erdhën si pasojë e mungesës së marrëveshjes dhe nuk duhet të lejojmë që të ketë zgjedhje të tjera”, deklaroi Kurti në Kuvend ndër të tjera.

Seanca e parë e legjislaturës së re u zhvillua me debate dhe përplasje mes pozitës dhe opozitës.

Më herët, deputetët miratuan raportin e Komisionit të Përkohshëm për Verifikimin e Mandateve, duke konfirmuar vlefshmërinë e mandateve të 120 deputetëve