Nën akuzë për sulm sek*ual, burg për 44-vjeçarin. E mitura kërkoi ndihmë te pika e karburantit

Gjykata Themelore në Ferizaj ka aprovuar kërkesën e Prokurorisë Themelore të Ferizajt për caktimin e masës së paraburgimit ndaj Shpëtim Ramës., i dyshuar për veprën penale “Sulmi seksual”.

Vendimi është marrë më sot, ndërsa ndaj të pandehurit ekziston dyshimi i bazuar se ka kryer veprën penale “Sulmi seksual”, nga neni 229, paragrafi 5, lidhur me paragrafin 1 të Kodit Penal të Republikës së Kosovës.

Rasti është raportuar në orët e para të 16 gushtit në fshatin Bibaj të Ferizajt, ku një 14-vjeçare kishte kërkuar ndihmë pasi, sipas deklarimit të saj, gjatë një udhëtimi me veturë ishte prekur pa pëlqimin e saj nga i dyshuari.

E mitura kishte kërkuar që të ndalej vetura te një pikë karburanti, prej nga kishte kërkuar ndihmë. Pas intervenimit të Policisë, i dyshuari ishte arrestuar dhe ishte shoqëruar në stacion policor.

Pas ndalimit prej 48 orësh, Prokuroria kishte kërkuar caktimin e paraburgimit, kërkesë të cilën tashmë e ka aprovuar Gjykata Themelore në Ferizaj.