Ngërçi politik në Kosovë, Albin Kurti: Do të përpiqemi çdo ditë për marrëveshje, qytetarët duan zgjidhje e jo zgjedhje

Kryeministri në detyrë i Kosovës, Albin Kurti, ka deklaruar se bisedimet për arritjen e një marrëveshjeje politike do të vazhdojnë, me synimin që Kosova të shmangë zgjedhjet e reja.

Kurti ka bërë të ditur se është në komunikim me liderët e partive të tjera dhe se përpjekjet për gjetjen e një zgjidhjeje politike do të vazhdojnë çdo ditë.

“Jemi në komunikim edhe do të përpiqemi për çdo ditë që ta arrijmë marrëveshjen politike në mënyrë që t’i shmangim zgjedhjet e panevojshme, të paarsyeshme, sepse ato vetëm sa do të përsëriten. Pra, u bëj thirrje edhe një herë liderëve të partive të tjera që të diskutojmë e të merremi vesh, sepse qytetarët e Republikës së Kosovës nuk duan zgjedhje, duan zgjidhje. E zgjidhja është marrëveshja politike”, ka thënë Kurti.

Ndërkohë, ministri në detyrë i Punëve të Jashtme, Glauk Konjufca, ka deklaruar të hënën se Kurti do t’u drejtohet sërish tri partive më të mëdha opozitare, me qëllim zhvillimin e dialogut politik dhe gjetjen e një marrëveshjeje.