Shqiptari që u vra në Baldissero D’Alba të Italisë nga pronari i shtëpisë ku dyshohet se kishte hyrë për të...
KOSOVA
Prapaskenat e themelimit të Gjykatës Speciale, Hoxhaj: Ja çfarë do të ndodhte nëse nuk e votonte Kuvendi i Kosovës
PiranjatPërditësimi i fundit 20 Shtator 2026, 22:04
Ish-ministri i Punëve të Jashtme të Kosovës, Enver Hoxhaj, ka rrëfyer prapaskenat e themelimit të Gjykatës Speciale, presionin ndërkombëtar ndaj institucioneve të Kosovës dhe debatet e vështira që kishin ndodhur brenda Partisë Demokratike të Kosovës dhe Qeverisë së Kosovës.
Hoxhaj ka treguar se në kohën e publikimit të raportit të Dick Martyt, institucionet e Kosovës kishin shqyrtuar mundësinë që ta padisnin atë, ndërsa partnerët ndërkombëtarë fillimisht kishin sugjeruar që raporti të mos merrej seriozisht.
"Nëse Këshilli i Sigurimit të OKB-së e themelon Gjykatën, me votë ruse dhe kineze, kjo mund të ketë pasoja marramendëse. 'Nëse nuk e themeloni ju gjykatën, e themelon OKB-ja'. Kjo ka qenë temë serioze. Kur ka shpërthy lajmi i raportit të Dick Martyt fillimisht në The Guardian, unë e di që atë ditë ne jemi mbledhë me Kryeministrin Thaçi. Reagimi i parë ka qenë që ne duhet ta çojmë në gjykatë Dick Martyn, që ai të përballet me drejtësinë. Por e di që edhe reagimi i parë i partnerëve tanë perëndimorë, i ambasadorëve amerikanë dhe evropianë, QUINT-it, ishte që ne nuk na nevojë që ta marrim seriozisht këtë raport. Unë mendoj që goditjen e madhe të dytë që e ka marrë Kosova ka qenë publikimi i raportit të Clint Williamson, i cili me një 8 faqe tekst pretendonte që pretendimet e Dick Martyt qëndrojnë.", ka thënë Hoxhaj.
I pyetur për presionin ndërkombëtar, Hoxhaj ka thënë se partnerët ndërkombëtarë fillimisht kishin dhënë shpjegime për nevojën e themelimit të Gjykatës Speciale, ndërsa më pas kishte nisur edhe presioni ndaj institucioneve të Kosovës.
"Shpjegimi ka qenë i natyrës që raporti i Dick Martyt ka prodhuar re të zeza mbi Kosovën. Këto re të zeza duhet të hiqen se janë në dëm të vendit. Pastaj, ka pas presion ndërkombëtar që thonin 'nëse ju nuk e themeloni gjykatën, e themelon OKB-ja' dhe kjo ka qenë temë serioze. Në atë kohë ne e kemi pasur një shpresë, që nëse themelohet nga Kosova, një gjykatë e cila është e Kosovës, nuk do të na bënte neve viktima të ndonjë dredhie apo kurthi gjeopolitik. Ne kemi mendu që nëse Këshilli i Sigurimit të OKB-së e merr një vendim të tillë dhe e themelon gjykatën me votë ruse dhe kineze, kjo mund të ketë pasoja marramendëse mbi shtetin e Kosovës.", ka shtuar Hoxhaj.
Hoxhaj është pyetur edhe nëse kishte pasur hezitime brenda Partisë Demokratike të Kosovës dhe Qeverisë së Kosovës për themelimin e Gjykatës Speciale.
Ai ka treguar se kjo çështje kishte shkaktuar debate dhe mosmarrëveshje të mëdha në institucionet e vendit, ndërsa ka theksuar se personalisht e kishte kundërshtuar fuqishëm raportin e Dick Martyt.
"Ka pasur hezitime, ka pasur debate të vështira në grup parlamentar, ka pasur debate të vështira në kryesi të Partisë Demokratike të Kosovës, ka pas debate dhe mosmarrëveshje të mëdha edhe brenda për brenda Qeverisë së Kosovës. Unë e kam sulmuar me krejt potencialin tim politik, akademik, raportin e Dick Martyt, i cili në thelb është racist. Kur e sheh raportin se çfarë shoqërie përshkruan, është koncept serb mbi shoqërinë shqiptare. Tek kur ka filluar procesi gjyqësor në Hagë, ne e kemi pa që motivi kryesor për të cilin është kriju gjykata, nuk ka qenë fare raporti i Dick Martyt. Ka qenë krejt qëllim politik. Kjo luftë speciale ndaj Kosovës do të vazhdojë. Nëse konfirmohet dënimi në Apel, jam i sigurt që faza e radhës, caku i radhës ka me qenë shteti i Kosovës.", ka thënë Enver Hoxhaj, në Histori të Pathëna në Klan Kosova.
