Refuzohet garancia 50 mijë euro, Hashim Thaçi mbetet në paraburgim

Ish-presidenti i Kosovës, Hashim Thaçi do të vijojë të qëndrojë në paraburgim, pasi gjyqtari i vetëm në çështjen për tentim pengimi të drejtësisë vendosi t’ia zgjasë masën edhe për dy muaj, duke e lënë në fuqi të paktën deri në tetor 2026.

Vendimi u mor pavarësisht kërkesës së mbrojtjes për lirim me kusht, e cila kishte propozuar një shumë prej 50 mijë eurosh dhe një paketë me 14 masa kufizuese për të garantuar respektimin e kushteve të vendosura nga gjykata.

Në arsyetimin e vendimit thuhet se garancia financiare, e ofruar nga vëllai i Thaçit dhe dy miq të tij, përbën një faktor që ul rrezikun e arratisjes.

Për këtë arsye, gjyqtari vlerësoi se Zyra e Prokurorit të Specializuar nuk ka provuar në mënyrë bindëse se ekziston një rrezik real që ish-presidenti i Kosovës të largohet.

Megjithatë, gjykata arriti në përfundimin se ende ekziston rreziku që Thaçi të ndikojë në proceset gjyqësore që po zhvillohen në Dhomat e Specializuara ose të përfshihet në veprime që lidhen me akuzat për të cilat po hetohet. Sipas gjyqtarit, këto rrethana e bëjnë të domosdoshëm vazhdimin e paraburgimit.