16-vjeçari Arjon Xhezairi ka ndërruar jetë në Spitalin e Traumës në Tiranë, pasi nuk arriti t’u mbijetonte plagë...
KOSOVA
Seanca e 9 shtatorit, PDK dhe LDK konfirmojnë pjesëmarrjen në Kuvend
PiranjatPërditësimi i fundit 7 September 2026, 18:46
Dy partitë opozitare thonë se do të marrin pjesë në seancën e Kuvendit, duke kërkuar përfundimin e procesit të konstituimit dhe funksionalizimin e institucioneve të Kosovës
Partia Demokratike e Kosovës (PDK) dhe Lidhja Demokratike e Kosovës (LDK) kanë konfirmuar se deputetët e tyre do të marrin pjesë në vazhdimin e seancës konstituive të Kuvendit të Kosovës, të caktuar për 9 shtator.
Kryetari i PDK-së, Bedri Hamza, pas mbledhjes së përbashkët të Kryesisë dhe Grupit Parlamentar të partisë, tha se PDK-ja konsideron të domosdoshëm konstituimin e Kuvendit para 16 shtatorit.
Hamza e ndërlidhi këtë datë me pritjet për zhvillimet në Dhomat e Specializuara në Hagë lidhur me ish-krerët e Ushtrisë Çlirimtare të Kosovës. “Ne jemi të bindur që në këtë kohë, Kosova ka nevojë që të ketë Kuvend të konstituuar. Ne presim që të festojmë në Kosovë, presim që ata të kthehen”, deklaroi Hamza.
Ai u bëri thirrje deputetëve që gjatë seancës së 9 shtatorit të shmangin, siç u shpreh, “lojërat politike” dhe të mundësojnë përfundimin e konstituimit të Kuvendit. Sipas Hamzës, PDK-ja ka kërkuar vazhdimisht respektimin e rendit kushtetues dhe institucional, ndërsa ka pretenduar se gjatë procesit të deritanishëm të konstituimit ka pasur shkelje të Kushtetutës, Rregullores së Punës së Kuvendit dhe vendimeve gjyqësore.
“PDK do të jetë në Kuvendin e Republikës së Kosovës. Vazhdimisht kemi kërkuar, kemi konstatuar me të drejtë, e kemi faktuar që ka shkelje të Kushtetutës, të Rregullores së Punës së Kuvendit, ka shkelje të vendimit të Gjykatës Supreme”, tha ai. Hamza shtoi se partia e tij prej rreth një muaji ka insistuar në konstituimin e Kuvendit dhe funksionalizimin e institucioneve.
Kreu i PDK-së njoftoi gjithashtu se partia e tij do t’i bashkohet “Marshit për Liri”, të organizuar nga platforma “Liria Ka Emër”, më 12 shtator. Sipas tij, 12 dhe 16 shtatori janë data të rëndësishme për PDK-në, ndërsa theksoi se pjesëmarrja në marsh nuk duhet të kufizohet nga përkatësitë politike. “Lufta e UÇK-së, e popullit të Kosovës ka qenë luftë e drejtë, luftë e imponuar, luftë për liri dhe pavarësi”, deklaroi Hamza.Pjesëmarrjen në vazhdimin e seancës konstituive e ka konfirmuar edhe Grupi Parlamentar i LDK-së. Deputetja Jehona Lushaku-Sadriu, pas mbledhjes së grupit parlamentar, tha se deputetët e kësaj partie kanë vendosur të jenë të pranishëm në seancë dhe të kontribuojnë në përfundimin e procesit të konstituimit të Kuvendit. “Vendosëm që të marrim pjesë në seancë dhe të japim kontributin tonë për t’i dhënë Kosovës institucione”, tha Lushaku-Sadriu.
Ajo deklaroi se vendi ka nevojë për institucione funksionale sa më shpejt, ndërsa theksoi se LDK-ja vazhdon të kërkojë përfundimin e procesit të konstituimit dhe kthimin e institucioneve në funksion të plotë.
Lushaku-Sadriu mohoi se në mbledhjen e Grupit Parlamentar është diskutuar për zgjedhjen e presidentit të Kosovës apo për ndonjë ndryshim të qëndrimit të LDK-së rreth kësaj çështjeje.
“Çështja e presidentit absolutisht nuk është diskutuar sepse nuk është temë. Temë është seanca dhe konstituimi i Kuvendit të Kosovës”, deklaroi ajo.
Me konfirmimin e pjesëmarrjes nga PDK-ja dhe LDK-ja, vëmendja tashmë është përqendruar te vazhdimi i seancës më 9 shtator dhe nëse deputetët do të arrijnë ta përmbyllin procesin e konstituimit të Kuvendit.
