Serbia plan për ta lënë Kosovën pa ujë/ Vuçiç: Beogradi paralajmëron ndryshimin e rrjedhës së Ibrit si kundërpërgjigje

SERBI- Presidenti i Serbisë, Aleksandar Vuçiç, ka rikthyer idenë për ndryshimin e rrjedhës së lumit Ibër në territorin serb, duke bërë të ditur se për këtë janë angazhuar ekspertë dhe inxhinierë, si kundërpërgjigje ndaj trajtimit të serbëve në Kosovë.

Gjatë një vizite në punimet e Urës së Vjetër Hekurudhore në Beograd, Vuçiç u shpreh se Beogradi ka vënë në lëvizje specialistët për të analizuar këtë nismë.

“Ne tashmë kemi ftuar ekspertët që merren me këtë çështje, sektorin e ndërtimit, inxhinierë dhe të tjerë. Meqë po e maltretojnë kaq shumë popullin tonë, të shohim, kemi arsye të ndryshme për ndryshimin e rrjedhës së Ibrit, dhe pastaj do të shohim se çfarë do të bëjnë shqiptarët dhe si do të sillen,” deklaroi ai.

Sipas presidentit serb, kjo ide nuk është e re, pasi ekziston që prej vitit 1985 dhe lidhet dikur me nevojat e banorëve pranë liqenit. Ai pretendoi se një projekt i tillë mund të ndikojë edhe në uljen e nivelit të ujit në liqenin e Ujmanit, nga i cili varet furnizimi me ujë për një pjesë të madhe të Kosovës dhe prodhimi i energjisë elektrike. Vuçiç u ndal gjithashtu te prishja e objekteve pa leje pranë liqenit të Ujmanit, duke thënë se po i ndjek zhvillimet nga afër.

Kjo ide ishte përmendur nga Vuçiç edhe dy vite më parë, kur ai kishte mohuar përfshirjen e Serbisë në shpërthimin që dëmtoi kanalin Ibër-Lepenc në Varagë të Zubin-Potokut. Duke u ndalur te situata aktuale dhe pretendimet e tij për mbrojtjen e serbëve, Vuçiç theksoi se Serbia është shtet sovran që vepron sipas interesave të veta, por përjashtoi mundësinë e një përballjeje ushtarake:

“Ndërsa, a është opsion për ne në këtë moment të hyjmë në luftë me NATO-n? Unë mendoj se nuk është,” u shpreh ai.