Dy varre 5,000-vjeçare mund të zbulojnë se si filluan piramidat e Egjiptit

Një ekip i Këshillit Suprem të Antikiteteve të Egjiptit ka zbuluar dy varre të fshehura për më shumë se 5.000 vjet në sitin arkeologjik Jabal al-Tayr. Sipas revistës Popular Mechanics, varret datojnë në periudhën e hershme dinastike dhe janë ndërtuar disa shekuj përpara piramidave.

Studiuesit thonë se varret ngjajnë me atë të mbretit Hor-Den në Abydos, një nga monumentet më të rëndësishme të Dinastisë së Parë, duke sugjeruar se teknikat e ndërtimit të varreve ishin përhapur në pjesë të ndryshme të Egjiptit që në fillimet e shtetit faraonik.

Sipas arkeologëve, njëri prej varreve ka pësuar dëmtime dhe një pjesë e blloqeve prej guri janë hequr e ripërdorur në periudha të mëvonshme, ndërsa tjetri ruhet në gjendje shumë më të mirë.

Megjithëse zbulimi ofron të dhëna të reja mbi evolucionin e arkitekturës funerare në Egjiptin e lashtë, identiteti i personave që ndërtuan këto varre mbetet ende i panjohur.