Frigoriferi mban erë? Këto truke të thjeshta mund ta largojnë

Një frigorifer mund të marrë erë të pakëndshme edhe kur pastrohet rregullisht.

Ushqimet e harruara, djathi, peshku, sallçiçet apo enët e pambyllura mund të bëhen shkak që aroma të përhapet edhe te ushqimet e tjera. Por disa hapa të thjeshtë mund të ndihmojnë në largimin dhe parandalimin e këtyre aromave. 

Hapi i parë është pastrimi i rregullt i frigoriferit. Rekomandohet që të zbrazet të paktën një herë në muaj dhe të kontrollohen ushqimet për datën e skadimit.

Ushqimet e prishura, veçanërisht ato të harruara në pjesën e pasme të rafteve, mund të jenë burim i aromës së keqe. 

Pas largimit të ushqimeve, pjesa e brendshme mund të pastrohet me ujë të ngrohtë dhe disa pika uthull. Duhet t’u kushtohet vëmendje rafteve, sirtarëve dhe gomave të derës, ku mund të mbeten mbetje ushqimore dhe papastërti. 

Një tjetër mënyrë është përdorimi i enëve hermetike. Mishi, peshku, sallçiçet dhe djathërat duhet të ruhen të mbyllura, ndërsa ushqimet e mbetura është më mirë të vendosen në enë me kapak dhe jo të lihen të pambuluara. 

Për të neutralizuar aromat, mund të përdoret soda e bukës. Disa lugë vendosen në një enë të cekët dhe lihen në frigorifer për të paktën 24 orë.

Edhe kafeja e bluar mund të përdoret si thithëse e aromave. Një tjetër mundësi është limoni, duke vendosur disa feta, lëkurë ose pak lëng në frigorifer. Limoni duhet të zëvendësohet pas disa ditësh. 

Si alternativa të tjera mund të përdoren mollët ose patatet e gjalla, por ato nuk duhet të qëndrojnë gjatë në frigorifer, pasi mund të prishen dhe të krijojnë vetë aroma të pakëndshme. 

Në fund, mënyra më e thjeshtë për ta mbajtur frigoriferin pa erë është pastrimi i rregullt, ruajtja e ushqimeve në enë të mbyllura dhe largimi sa më shpejt i ushqimeve të prishura.